Home / Budaya / Juguk Tondo Boto Uwaki Manungkol Isang

Juguk Tondo Boto Uwaki Manungkol Isang

Hatiha dimarayak potang niari juguk tondo mada uwaki manungkol isang di karosi otang di barando nibagas ni ibana, pupu cukcek songon sorani kareta api namardalan, manombo mopeng-openg ulunia adop ginjang, madung adongdo dipikirannia nasungkot sanga namabiartupe uwaki itarik ramping-ramping suping inda binoto, arsak situtuma nida manurut panjaharonai.
Arana dompak onmasona simbur kecek nihalak satontang namarjabatan nangkan na adong perampingan ibaen pamimpin nabaru, salolot naon rupana mabutongtu sistim komando nai bahat manabur-nabur pitih ningna, pandokon ni halak binege nabahatan nangkan ambungonkon, awas ramping-ramping suping ningna bagemada boto caritoi.
Baenima mungkin anso tondo-tondo uwaki di barando nibagas niai salaos mangapus-apus ulunia nadung ranggason, salolotnaon namandapot dibana do ia antong arana donokia tubanggari malo ia mambuat nairagi inda jabat sega sisik nai, padiarpe sala ibela banggari doia, arana ampot baen nasamargai halai nabengkokpe tarbaen mei antong lidang songon batang ni bonban.
Mamolus mada Honda Yamaha namatupek sorana ijolo nibagas ni uwaki, taru naganjilma ibegesa sorani Yamahai, awas ona jorat, pature DAK, pature DAU sanga jorat tanganmu, ulang songkik guru, lehen patibu sanga kaliru indatahan boto ona parburu, ningnama ibege uwaki padohal Yamaha namaturepekdo mamolus, mur marsitutu motar ni jngkir ni uwaki boto.
Baen adongdo donganniba nasakoje dimaso-maso nasalpu ipio doma jolo ansoro ibana manorang-norangi pikiranniba, nasusah mantong namangoluonda, nig roa ni uwaki mada salos ibuatia Hp, ipio ia mantong dongan nia nasakojei, inda sadia lolot tolapma tu jolo ni bagasi, dongos-dongos pangkosana.
Mabia habar uda ona rampingkondo ruai supingta ibaen pamimpinta nabaruon, nasotarpodomdo boto pala borngin, marsak roa niba ampot naharomma ita dongan, arana madung idokon halak dabo nagkan irampingkondo supingnai tardok nadonok tu banggari, ning bayoima mandokon uwaki salaos ipajugukia.
Madung marsak iba mamikirkonna, dipioho ro tuson mangalehen panorang-norangi nipikiran ningroa, hapengani namambiar-biari musedoho, anggo songonon sajo inda namanjadi karejoon, iambangko dope dabo ningrongku naso marsak situtu pikiranku, tako namarsilopehkon dirina dom ita ning uwaki mada mangalus laos mopeng-openg botak nia.
Tenang uda inda adong naso salose karejo, sudena nangkan berakhir dei, songondiape boratna persoalan maso-maso nalewati, dompak dihita sitang ni kareta apii salolot naon lolosdo sude hita baen, ulang pupube mandokon tenang sanga dopeng naron siambirangon markecap bibiri, ulang iambangho napa-napa doe bolusonon, madung ditopi laing-laingma, sala sakiek taru na ibuldo magulang tu ruraan, ning uwaki salos panaet sigret, mangalcikma maneleng-neleng botaki mangadop langit.***
by:Lubis

Comments

Komentar Anda