Home / Budaya / Marbagi-Bagi Jabatan di Lopo Kopi

Marbagi-Bagi Jabatan di Lopo Kopi

Dung tarbonggal nangkan nalantikon Bupati dohot wakil Bupati Madina nabaru simburma dilopo nangkan natarjadima ramping-ramping suping, anggoon bahatma namargopak-gopak arana taldus jugukani ningnama boto kecek ni halak tarbege dilopo-lopo ning sutan mangkahap mantong markombur dilopo sijabolboli.
Natangkang nagiot roon madung tarsuratkondo sanga ise nangkan namarjabatan ningnama binege, anggo ningroangku bahatma natiarap, angke naisuru musema mambalun amak, songonimada binege kecek ni halak, adong sada si tim sukses ningkalai gorarna, sianu tukantor nailombang, sianu manjadi juru tulis, sianu nangkan na camat,donganta na ginjang godangi nangkan na katua dua mantong, anggo sianu dohot sianu inda nangkan napakeonbe, itoskon mei ning si tim suksesma margujo doma boto ijur nia namangeceti ning bocek abuan muse mantong manguduti caritoi.
Naheranna iba namambagi-bagi jabatan dilopo kopi nameja kosongdo salolotnaon, nasoadongdo jabatanna, tai simburma carito nalantikonma Bupati nabaru, mambagi-bagi jabatanma naso marjabatan, anggo songonon sajo mantong pasangna indaba nabanabe karejoon naso marjabatan mantong mambagi-bagi jabatan, propokator doma gorarnai, ning bayo nahapal kumisna musema laos panaet pangidupan.
Pala songoni mantong nangkan natarjadi karom doboto biarku parau, dilopo-lopo mantong mangkecek-kecekkon jabatan halak naso marjabatan, anggo ningroangku pade mei ipulung ubat ni bayo nabahatan kecek nai, arena jabatan niape inda natarpature ia jabatan ni halak musema bagi-bagion nia ning sutan mangkahap antong salaos mondok-ondok ulunia.
Anggo bayo nalomlom napolcik parsaraorna, natarmenek pamatangna nasitutuma boto pala mangecek, narahangnama ia binege mangatur-atur jabatan dipamarentahan, tai heranna iba nalolotma ning halak nasodongi jabatan nia, dongan-dongan pagawe namarsibaen harejonado di kantor nabe, tai anggo bayoi namarkomburma sasalobong-ari dilopo, halak tu kantor ia tulopo angke naso adongdo jabatan nia, kecekdo namarlopusan, aropku ima naidokon ni halak godangan pasak pado tiang, ning bayo nahapal sisungutnai musema manguduti caritoi.
Nasongoni mei dabo pala bayo naso mamboto untung, iambang ia napa-napa hape naholbung, iambangia baro hape lampidung, iambangia gule gulaen hapengani gule torung, iambangia muse sere hapengani galundung, anggo binege Bupatinta dohot wakil ni Bupatinta nabaru, nangkan napature Madinaon do anso mur mapade hangoluan ni rakyaton, mur-sejahtera ning halak namalo mangkuling, ulang mur mapincur nian sugari hangoluan nirakyaton, ido visi-misi ni Bupatinta nabaru, inda namangadu domba pagawe-pagawe, iboto Bupatinta dei sanga ise halak napade pakeon, inda nagiot ibana anggo pagawe na godangan kecekdo songon si tim suksesi,m ning sutan mangkahap muse mantong mangalus.
Sangajo rado mabaen gaor jombur pala songoni kecek ni halak dilopo-lopo, arana inda tempatna lopo mambagi-bagi jabatan, dikantor dei, inda namomo karejoi boto naadong dei aturan mainna gorarna, itudu si tim sukses songni dohot jari-jari nia, sianu meja kosong, siani tu pamarentahan, sianu tu bagaian parkepengan ningia dilopo-lopo, anggo au marpandapot naurang podal dei bayoi, ning bayto nahapal sisungutnai muse mantong mangholas-holasi, salaos ruk-rekma iponnia mangan kacang goring.***

Comments

Komentar Anda

Silahkan Anda Beri Komentar