Home / Budaya / Marsarak Mate

Marsarak Mate

Marsarak Mate Grafis

Marsarak Mate Grafis

Cerpen Mandailing

Karya : Mustopa Kamal Batubara

 

Potang ni ari na sangat jogi, i toru ni alibutongan na manorangi. Hajogianna tibo-tibo mago harani rimbus ni udan na ro mangompoti. Ngon bagas papan maralaskon tano, u paligi-ligi rimbus ni udan naso juo maradian. I samping tingkap au martungkol isang painte udan anso siang.

“Rahmat, madung ipasimpan ko ma lalu sude barang-barang na get obanon i amang?” jou-jou umak ngon dapur.

“Mandung umak, ma u pasimpan ma sude” ningku mangalusi umak.

Naron borngin baya u tinggalkon huta hasorangan on. Nangkan u langkahonma simanjojak manuju pangarantoan. Jakarta, kota na u haropkon bisa manguba ngolungku. Tarpaksa au kehe mangalangkahon pat on tu sadun harani inda bisa au songon dongan-dongan na lain ibe, sikola di bangku parkuliahan.

Cahayo ni bulan dohot do marudur pabuot au diborngin ni ari on. Bus ALS na marwarna rata laut i pe muloi ma patidahon wujudna sian na dao i. Udan di potang ni ari nangkinan tibo-tibo turun mulak, u ida aek nai mangalir ngon sudut mata ni umak. Aek ni matangku pe maraburan mangalepekkon bumi waktu u kaluk umak.

“Umak, doahon anakmon anso manjadi alak na sukses saulakon”

“Olo amang. Doa ni umak salalu mangiutkon si manjojakmu. Mudah-mudahan amang dapot ko sude hagiot ni rohamu”

Bus ALS na u tengget pe marangkatma maninggalkon huta Bange, Bukit Malintang on. Hakeheanku diiringi doa dot tangis ni umak, songoni juo koum-koum na pabuotkon au di borngin ni ari on.

 

***

Dung manempuh pardalanan tolu ari dua borngin, akhirna bus na u tengget sampe juo ma di kota Jakarta. Ise naso kagum mangaligi hajogian ni kota on. Gedung-gedung godang-godang manjulang hampir sanga tu langit. Motor marampar mamadati dalan raya. Taman kota deges menghiasi satiop sudut ni dalan. Ate-ate sonang mangaligi sude hajogianna.

Dung sampe di stasiun bus, parudak on pe ro juoma mangalap au. Bope nga udak kandung, tai denggan ni roana mangalobi i udak kandung do ulala. Udak on, dongan ni almarhum ayah do najolo. Udak onma topotanku di kota on. Targan so dong dapot karejo, i bagas ni udak on ma au tinggal sementara waktu.

“Rahmat, selamat datang di kota Jakarta” ning udak.

“Tarimokasi ma sagodang-godangna udak atas sambutan nai”

“Olo. Nadia do barang-barangmu, so barangkat kita sannari tu bagas”

“Na onan udak”

“O. Kehe ma ita soni sannari”

“Jadima udak”

Manyogot na sangat cerah, tai marbeda dot ate-atengku sadarion. Nga u boto sanga aha sobabna. Mungkin inda pe sada roangku baen na so adong i dope dapot karejongku na jelas. Um na manolong-nolongi adabori ni udak i dope au marjagal  i parjagalan ni alai on. Anggo udak tong supir ni motor angkutan kota do.

“Rahmat, tolong jolo angkat danon on tu motor ni kakak on”

“Olo etek”

Tibo-tibo dung u angkat danon, mangkuling ma HP tulalit na adong di cakuk kananku. Langsung u ligi. Telepon ni umak ngon kampung.

“Assalamu ‘alaikum Rahmat, hallo”

“Hallo umak, walaikum salam”

“Rahmat, jam piga lalu amang sampe na?”

“Jam sapulu i nangkin umak, maaf umak nangkin na get u telepon do umak, tai baen na manolongi etek i dope, inda pe bisa au nangkin manghubungi umak harana bahat alak na manabusi”

“O jadima amang, alak etek dot udakmu ma sondia kabarna?”

“Alhamdulillah alai pe sehat juo do umak”

“O syukur mada amang i”

“Alak umak pe rangku sehat juo do i huta”

“Alhamdulillah sehat juo amang”

Bope idokon umak sehat, u rasoi do sanga aha na irasoi ni umak i sannari. Maros-ros ate-ate ni umak na marsarak i baya dohot anak nia. U rasoi do ilu mata ni umak na maraburan waktu martalepon on dot au, tai nga ipatanda umak so ulang tangis buse au.

“Mak, ulang umak tangis, ipas do au tongkin nai mulak, dung dapot au aha na u cita-cita on i”

“Olo amang, mudah-mudahan nian mukobul sude pangidoanta”

“Olo umak, ulang tangis umak be da, so ulang martamba sedih u lala”

“Olo amang, rahmat sampeon kirim solom ni umak tu alak udak mu da”

“Olo umak”

Parputaran ni waktu boti na sangat ipasna. Madung gonop sabulan au di kota Jakarta, tai na les so dapot dope baya karejo. Pas mambuka parjagalan, tibo-tibo udak manopotkon au. Mungkin adong get dokonon ni udak jau.

“Rahmat, madung ita ida sannari ama na payah manjalaki karejo di Jakarta on. Madung gonop sabulan ijalaki udak diho karejo, tai les na so dapot dope. Sondia do ning roa pala jadi kenek ni angkot ko jolo sementara soni?”

“O nga mua ba udak i. Kenek ni udak do?”

“Inda. Kenek ni dongan do gari. Anggo kenek ni udak kan adong dope”

“Jadima udak. Soni pe jadi”

“O jadima. Naron ma ikabari udak dongan i”

“Olo udak”

Milas ni ari inda mambaen tondingku surut di tonga ni ari on. Bope sude rintangan ro mangalawan au ngon sude arah, inda angkan surut au tu balakang. Angkon na marusaho au sungguh-sungguh anso bisa u baen alak umak bahagia.

 

***

Inda pe gonop dua poken jadi kenek, tibo-tibo dongan ni udak i mamecat au harana kenek nia na onoki get karejo mulak. U ida do hata-hata sulaha di boi nia waktu paantak au. Ia pe maila juo do tu au laos mangido moof . U kuatkon ate-atengku anso tabah manghadopi sude cobaan on. Yakin do au, i balik ni sude peristiwa na tarjadi on pasti adong hikmahna.

Inda pe murak bugang na itinggang tangga madung ona tinggang buse iba. Tibo-tibo diusir udak buse au ngon bagas nia, harana alak na maradong na i samping bagas nia mandokon au mandonok-donoki boru nia na margoar si Lia. Padahal si Lia do na mandonok-donoki au satiop ari. Ia do na cinta mate tu au.

Lima ari lima borngin au tarlantar di tonga gersang ni kota Jakarta on. Muda borngin modom maruloskon ombun maramakkon tano. Botul-botul hancit ma baya u lala na mangalewati rompo-rompo ni ngolu on.

Tibo-tibo HP mangkuling di ari na sangat milas. U ligi layar ni HP, umak manalepon ngon kampung. Inda u boto be sanga sondia pala iboto umak au na ipaorot ni udak ngon bagas. Mudah-mudahan ulang sanga iboto umak so ulang jadi partongkaran di pudi ni ari.

“Assalamu ‘alaikum Rahmat”

“Walaikum salam umak, ma sondi kabar ni alak umak i kampung?”

“Alhamdulillah sehat amang, ho pe rangku sehat do?”

“Alhamdulillah sehat juo umak”

“O jadima amang. Ma mangan kotu amang?”

“Madung umak” ningku, padahal muloi manyogot i naso mangan dope, harana mandung abis epeng i cakuk.

“Alak umak pe rangku ma mangan ma?”

“Mandung juo amang. Taringot nai tagi do rangku jadi kenek ni angkot i amang?”

“Alhamdulillah tagi doba umak” ningku, inda u dokon di umak na dung ona pamantak au karejo, so ulang mambaen arsak roa ni umak.

“O jadima amang. Soni ma jolo amang da. Kirim solom ma soni tu alak udakmu”

“Olo umak”

Dung mangecek dot umak lewat telepon, tibo-tibo taringot au tu dongan sakalasku waktu SMP sakali, goarna si Sabil. Sannari Ia kuliah di Jakarta on. U telepon nomor nia, Alhamdulillah les aktif dope. Ompot bisa ia mambantu au na dompak kesulitan on.

“Assalamu ‘alaikum, botul do on si Sabil?”

“Walaikum salam, olo botul. Ise don ?”

“Au do on Bil. Si Rahmat donganmu waktu SMP i”

“O, ho do Rahmat on. Nomor baru hontong ima so nga itanda kawan”

“Songonon Sabil bisa do au dongan mangido tolong, alap jolo au gari sannari tu monas. Na ginjangan caritona, naronma u carito on jo”.

“O jadima Mat, painte isi da so u alap sannari”

“Jadima Bil”

Lintasan alibutongan manamba hajogian ni potang ni ari, i bagas kos ni si Sabil on. Matahari pe tarida maila-ila mikim get marsimonjap tu balik ni sonja na rara. U ucapkon tarimo kasi na sagodang-godangna tu si Sabil atas sude bantuan nia, harana epeng pe ipainjamkon ia do jau sebagai modal usaha. Botul-botul ma si Sabil alak na maruntung dunia akhirat, harana sinakayoan nia i, ibaen ia tu dalan na denggan.

Marmodalkon epeng pinjaman na ilehen si Sabil i, u buka ma usaho jasa pambaenan spanduk. Alhamdulillah tiop ari usaho spanduk na u buka on martamba maju. Sannari karyawanku lobi saratus alak. Au pe malanjutkon sikola mulak, sannari au kuliah di salah satu Universitas terkenal i Jakarta.

 

***

Ari margonti bulan, bulan pe margonti taon. Sadarion au nangkan diwisuda, tai baya alak na paling u cintai inda bisa hadir harani umak inda bisa berjalan jauh be baen na dung matobang i. Salose sude acara wisuda. Mangkuling HP ngon cakuk.

“Assalamu ‘alaikum.. bang panyakit ni umak tibo-tibo mungkap mulak, sannari na gulung sajo doma umak i podoman”

“Walaikum salam. Hah… mua nimu Nurul ?”

“Marun umak Bang, mulak jolo gari abang”

“Pio jolo mantari bage”

“Mandung bang, mandung ison ma mantari pe”

“Sondia doma roai tie harana na itempat ni wisuda dope abang on”

“Na malungun bage do rangku umak tu abang i, harana ipio-pio umak sajo goar ni abang. Sondia doma bang?”

“O painte pala so itelepon abang jolo pambuotan ni tiket, sanga adong dope pesawat na berangkat tu itaan”

Dung tolap i kampung. Langsung masuk au tu bagas. Aek ni matangku mangalir mangalobi i doras ni aek batang gadis. U salam tangan ni umak, ukaluk umak. Mangido moof au harana tarlambat sampe tu bagas. Umak pe tangis marcampur bahagia harani pasuo dot au. Sonang ni roha ni umak tarida ngon muko ni umak mangida au mamake baju wisuda, naso sompat u buka nangkin harani sosakna tu kampung.

“Umak baju wisuda on, u persembahkon tu umak. Ipas umak sehat. Olo umak”

“Olo amang. Na sangat sonang na ate-ate ni umak maligi ho mamake baju wisuda i”

“Umak, aha do giot ni umak so u tabusi. Diumak do sate, bakso, pizza ?”

“Inda amang. Kesuksesanmon pe madung na jopan roa ni umak. Rahmat amang, pasikola mulak anggi-anggimu amang tongkin nai da, so jadi alak na sukses alai, songon ko on”

“Olo umak, marjanji au nangkan u pasikola do anggi-anggingkon. Na utamona, ipas jolo umak sehat”

Tibo-tibo umak inda mangkuling be. Taroktokku dosar-dosar. Pikiranku inda manontu. Mantari na i samping kananku pe heran mangida umak tibo-tibo langsung sip . Langsung ipareso ia boltok ni umak.

“Inna lillaahi wa inna ilaihi roojiun, madung kehe ma umakmu rahmat manghadop na kuaso, sobar kita da”

“Umak,,,,”

“Sobar kita Rahmat”

“Moofkon au umak…”

Aek ni matangku mangalir mambanjiri kampung. Mukongku marbosari harani ngot-ngot ni ate-ate. Tangisan ni alam dohot do pataru hakehean ni umak manghadop Ilahi Robbi. Onma rupa parsuon terakhirku dot alak na paling u cintai di ginjang ni dunia on. Anggo inda baen na hamatean, inda nangkan ra au mandalani parsarakan. “Selamat jalan umak, painte anakmon i pintu ni surgo” ***

 

 

Profil Pengarang

 

Mustopa Kamal Batubara lahir di Bange, Bukit Malintang, Mandailing Natal, 28 Oktober 1992. Ia pernah menempuh pendidikan di SD Negeri 147545 Bange Kec. Bukit Malintang, MTs Negeri Siabu, Pondok Pesantren Musthafawiyah Purbabaru. Saat ini ia tercatat sebagai mahasiswa Hukum Tata Negara Fakultas Syariah & Hukum Universitas Islam Negeri Sultan Syarif Kasim Riau (UIN Suska Riau)

Selain kuliah, ia juga aktif di Sastra Rumahkayu Pekanbaru, HMJ HTN, UPTQ UIN Suska, IM3 Madina Pekanbaru dan sebagainya. Putra asli Mandailing ini dalam waktu dekat akan melaunchingkan buku “Facebook Mengguncang Dunia Akhirat” dan saat ini sedang menulis novel “Ayat Ayat Surga”. Karya-karyanya telah melang-langbuana di harian Riau Pos, Singgalang Padang, Gagasan, Buletin Makna, Riau.kemenag.go.id, Maknasia.com, Rumahkayuindonesia.com dan sebagainya. Blog pribadinya bisa diakses di: www.karya-kamal.blogspot.com.

 

 

 

Comments

Komentar Anda

Silahkan Anda Beri Komentar