Budaya

MARSIDAO-DAO (2)

Marsidao dao cover
Marsidao dao cover

Novel Mandailing

Naisuratkon : Dahlan Batubara

Dung salose mambuot parira, kehe alai lao marpalan-palan mamolus gadu saba sareto pupu mamangani parira. Tarpaiada ji alai talaga ni tobat tar bahat tarida gulaen piri-piri dot capet. Adong muse tarida namalkot ilambung liang ni talaga i, na igalbuk ni aruting. Dodasna, pala adong namanggalbuk tar miduk mei gulaenna, mari-ari piri-piri dot capet bahat do tarida ji alai.

Baen tarmiduk nida alai, iarsik alai talaga ni tobat i. Adong namanual lata mambaen panobot, adong namanjalaki lopok ni pining mambaen panimba, adong muse manyumpol pambulu ni saba tobat i, harana bope nagumorsing eme ni parsabai, les adong do aek mambolus sian bondar kalihir ni saba i tu pambului.

Margonti-gonti alai manyampakkon aek ni talaga i, santak marsik. Adope marsitutu margoso-goso sada-sada namanangkupi gulaen i. Aporas, piri-piri, capet tarmiduk ma tarpalagut. Si Poso namamoluk liang i pupu mandapot aruting dohot tingkalang. Baen gosona namanangkup gulaeni, margulu doma pamatang ni alai sada-sada. Si Poso pe taru nabustak doma imuko dot ulu nia, mata doma natarida.

Tardua kali manggule be do alai dung marbola gulaeni. Marsiopol ma dohot bulung suat sareto ikobet dot sarisir ni pisang. Targan so maridi paias sibuk, iela alai mulak panyumpol ni pambulu saba i.

Dompak namardalan muli i alai marudur-udur litak-litak i gadu saba i, tarbege sora ni bahang Asyar tingon masojid na i huta. Mataniari pe madung geleng tu jae mambaen alilu ni alai dohot mardalan-dalan i ginjang ni eme saba i.

Narem-rem do pamatang dohott saraor Si Poso manopotkon alaman bagas ni alai. Baju nia les sandang iabara nia sareto les tiop opolan bulung suatna marisi gulaen. “Assalamu’alaikum” ningia laos mambuka bagas ni alai i.

“Walaikumsalam, sian jia do ho, Poso,” ning umak nia najuguk manyorpi baju i pantar tonga bagas i.

“Mangarsik-arsik talaga ni saba, umak. Bahat doma dapot,” ning si Poso, laos patidaon gulaen na ibulung suat i tu inang nia.

“Alhamdulillah, iela amu do panyumpol ni pambulu nai mulak kan?”.

“Olo, umak. Ami ela do mulakan”.

“Imada, angkon iela dei mulak, so ulang sega eme ni alak. Dungi inda tola mambuot-buoti alak puna, inda ijagit sarugo badan niba saulakon i akhirat pala ipambuoti alak puna”.

“Ngada mambuoti ami, umak. Parira na i gadu ni alak Si Koccu i maia nangkin ami buot, harana antong ngada laku pala igadis alai pe parirai”.

“Bope naso jialaknai parirai, angkon naipangido do tu alak nai so ibuot. Les namanangko ma goarnai. Inda langa isi amang ni si Koccu nangkin?”.

“Inda, umak”.

“Anggo soni, pala tarpaida amang nia, mangido izin ko tu amang nia da, amang”.

“Olo, umak”.

“Kemani mangan, tadingkon ji anggimu balanak nai, naso mangan dope ia,” ning inang nia. (marsambung)

Comments

Komentar Anda

Silahkan Anda Beri Komentar

Situs ini menggunakan Akismet untuk mengurangi spam. Pelajari bagaimana data komentar Anda diproses.