Home / Budaya / MARSIDAO-DAO (episode 11)

MARSIDAO-DAO (episode 11)

Marsidao dao cover

Marsidao dao cover

Novel Mandailing

Nanisuratkon : Dahlan Batubara

Ira-ira pukul 2 tonga borngin, sidung ma pargalundung i manggiling batu i. Dung iparelaisa panyanggop ni galundung i, ipamela ia ma sorbuk ni batu i tingon bagasan ni galundung i pake aek nanipambuluon tingon bondar na ilambung ni aratak pargalundungan i. Dungi marmayupan ma sorbuk batu i tu pancur na adong i topi ni aratak i, na mamancurkonna tu sada ayan na ipatibal itoru pancur i.

Niengge-engge pargalundung i sorbuk batu na i ayan i. Marmelahan ma sorbuk nai songon orsik na lamot-lamot. Pala adong sorbuk serena, marlokotan mei tu quik asape mercury goarna, marsarak tingon sorbuk ni batu i. Sorbuk ni sere na madung lokot tu mercury i ngada ra dohot mayup tingon ayan i, harana hum borat do sere i tingon sorbuk batu i, mari-ari mercury pe hum borat muse tingon sorbuk batu.

Dung otik nai doma sorbuk ni batu i i ayan i, ipatungki musengan ma tu ayan na menek so mur urak sorbuk batu nai. Dung jot-jot ipatungki tingon ayan nasada tu ayan nasada, kasidunganna quik na impal i doma na tading. Na impal on muse ma ipatungki tu sada abit namenek nangkan ipudor. Dompak mamudor nai, marmelahan musengan ma quik nai, lilis tingon abit i. Manateki quik i tu ayan i. Kasidunganna tading ma na impal pir ibagasan pudoran ni abit i, suang timah nabontar ibul songon pira manuk, ima sorbuk ni sere namarbalun-balun ibagasan mercury.

“Tar deges do arasoki muyu,” ning pargalundung i sareto paombang abit i i tangan ni ia. Taru marngangangan doma alai mamataina. Angke ibul nai sagodang ni pira manuk.

“Alhamdulillah,” ning Si Jaleto.

“Olo, godang mada, tai dung igembos mantong jolo so binoto sanga sajia godang sidungna, antap na sarimbang sanga sapira ni cocak do,” ning Si Rotul.

“Imada, mudah-mudahan sagodang pira ni ruak-ruak pe nian baya sugari,” ning Si Imran.

Manyogot ni ari, langka ma alai tu poken Panyabungan, ima nagiot manopotkon panggembos ni sere, ima na adong i pasar baru na adong i Sipolu-polu.

I tontang ni KPU Madina, manyirpang ma alai tingon lambung ni RSU Armina i, so ulang tarbolus pasar lama boti kantor ni Satlantas i, harana ngada marhelm alai na mar honda i. Dat-dat ra do par Satlantas i painteon boti mangambat halak na marhonda naso marhelm.

“Giot manggembos do ami bo, ipar,” ning Si Imran tu bayo penggembos sere i dung tolap alai tu panggembosan i.

Ipatibal penggembosi ma naibul sapiramanuk i tu sada takar namenek. Ngada takar ni arambir, tai suang do songon takar, ima na tingon tano na ipaibul songon tompa ni takar ni arambir. Dung tibal i takar i, i bosik ia ma dohot api, ima api nasuang api ni tukang las. Pupu ma mur mamenek naibul sapiramanuk i, santak menek doma, ira-ira sagodang danon ni apadan. Dungi madung gorsing muse tarida, ima goarna sere.

Taru manoloni ijur doma talonan ni alai mamatai seri i. “Alhamdulilah,” ning Si Imran.

Itimbang bayo i ma sere i. Boratna tar 4 gram kadar 65. “Homu ma soni manabusina,” ning Si Rotul tu bayo panggembos i. Isurduhon bayo i epengna sabahat 1.150.000 tuor ni sere i.

Dung tolap alai tu huta do na marbola epeng i. Sada halak dapotan 135.000 rupia be. Tading ni parbolaan ni epengi ma panggarar ni tes kopi dohot sigaret ni alai dungi panggarar tu pargalundung i.

“On ma arasoki ni mangaleles i,” ning Si Imran sareto manyurduhon epeng 100.000 rupia tu adaboru ni ia Si Siti, dung tolap Si Imran tu bagas ni alai.

“Oh..alhamdulillah,” ning Si Siti salaos mikim tu alaklai ni ia i. “Deges do arasokina tile,” ningia. (marsambung)

Comments

Komentar Anda

Silahkan Anda Beri Komentar