Novel Mandailing

Nanisuratkon : Dahlan Batubara

“Imada, les adong ma dungkap-dungkap ni balanjo. Dungi, 35.000 utiop dope ambaen tambang tu Huraba. Harana adong angan-angan ni ami nangkan kehe marsidao-dao tu Huraba ancogot,” ning Si Imran.

“Bo, maua ma langa saba i sadun,” ning Si Siti.

“Dompak manyabi rupana maso on. Pala ngada dapot ancogot pangomoan manyabai i Huraba, mamiari doma angkanna so les adong rasoki na ialap tu sadun,” ning Si Imran.

Golap-golap bontar ni ari i mangalao Si Imran dohot 4 halak dongan ni ia ima namangalo tu Huta Huraba nangkan manjalai pangomoan i huta balian. I dalan nagodang i, iambat alai motor Anatra nangkan maroban alai tu Huraba.

Tar sigop do alai na tu huta balian i anso sigop tolapna tu Huraba, ulang jabat marinjang ni ari anso momo mandapot pangomoan, harana nangkan manjojori banjar ni huta i dope alai marsapa-sapa sanga ise halak i huta i namamorluon hatoban nangkan mangomo i sabana.

Madung tar pukul 8, naso adong dope dapot alai pangomoan. Inda na sada dua be na isapaan, ganop banjar ma ibolus boti manyapai ganop halak na tarida, totop do suada na mamorluon hatoban tu sabana.

“Manjalai pangomoan do homu, koum nami,” ning sada bayo namambege sapa-sapa ni alai.

“Olo mada, Uda. Sian Huta Donok Panyabungan do hami ima namanjalai pangomoan i huta on. Angke pangomoan madung borat  i huta ni ami,” ning Si Imran arop bayo i.

“Bo baya, sapetona au nagiot manyabi aduan nia ari, pala nalapang do homu aduan, homu ma sugari manyabina bo, so ulang manjalai halak au be,” ning bayo i.

“Olo baya, Uda, lapang do ami aduan. Ami ma soni manyabina ning Uda,” ning Si Jaleto.

“Anggo songoni upio jolo inanguda muyu so tohom parpokatanna. Ooo..umak ucok..!! tu son ma ho jolo,” ning bayo i manjoungkon dadaboru nia mangadopkon bagas ni ia ima na adong bona ni jambu orsikna i jolo bagas i.

“Olo,” ning dadaboru i sareto mangalaho tingon jolo bagas i sarero pature tauluk i uluna. Dung tolap dadaboru i, ipokati alai ma nangkan manyabi saba i. Pandokon ni dadaboru i, inda tuk pala lima halak, angkon tar pitu halak ma sugari so sigop sidung sabion i potang ni ari. Urang ni halak nai bolas do alak Si Imran manjalaina. Dungi, tahi ni pokat angkon na tolap ma alai pukul 7 manyogot tu huta i aduan ni ari so sigop mamangkal sabion, angke udan na pupu ro ima so sigop mamangkalna antap sidung sabion sapotang ni ari.

Dung hibul tahi sareto marsisoloaman dohot bayo i, alai pe kehe palalu alalao marsapa-sapa pangomoan i banjar i. Madung ijojori alai sude banjar, ngada dapot pangomoan sadari i, harana halak parsaba na manyabi madung adong pokat tahina dohot halak nasihil na marpokat natuari boti tuari sada. Adong do dapot alai pangomoan, tai dung aduan doma. Jaru pe songoni ikobet alai do tahi dot parsaba ima nangkan mangomo tolu ari nangkan ro. Adong muse opat ari nangkan ro, adong  lima ari na ro.

“Aropku, mamiari ma hita dumenggan, les naso adong do dapot pangamoan sadarion,” ning Si Imran.

“Soni pe tama mei,” ning Si Dalkit. Hibul pokat, mamiari do alai sadarion. Jaru pe songoni, markopi dope alai tu lopo salaos painjang-injang ari dompak so kehe tu saba-saba an manjalai durame nangkan piaron. (marsambung)

Comments

Komentar Anda