Home / Budaya / MARSIDAO-DAO (episode 17)

MARSIDAO-DAO (episode 17)

Marsidao dao grafis

Marsidao dao grafis

Novel Mandailing

Nanisuratkon : Dahlan Batubara

“Olo, doaon ma so les iras inanta, doaon so tibu adong parsuoanna”.

“Imada, mudah-mudahan les iras ma inanta, adong parsuoan, amin,” ningia.

“Ancogot borngin so uecekkon ma jolo tu kahanggi, dung sidung mananktak sibodak i bagas orja ni Uda Maramis, anta dapot dalanna sanga songonjia napadena,” ning Si Imran salaos mangalap ilu ni dadaboru i dohot parompa.

“Olo, mudah-mudahan adong dalanna tingon kahangginta,” ningia.

“Pasada ma roamu, ulang tangis be, ligima madung tarsunggul mulak Si Rahim i ampuanmu,” ning Si Imran. Ipatrue Si Siti mulak juguk nia sareto patongon daganak nia mulak na memek i.

Ari mur maborngin. Rimbus-rimbus ni udan pe madung mur marasok. Golap ni ari lumobi santak nibaen langit les na lomlom i ginjang. Kakauak ni manuk sabungan tarbege tingon tonga ni huta, nanialusi kakauak ni sabungan na tingon jae. Mangalusi muse na tingon julu. Ima kakauak ni sabungan i pukul 11 borngin.

Adong namandokon, pala markakauak sabungan pukul 10 sanga 11 borngin, nibaen na adong ma alak na manggampang i huta i.

“Peto do langa pandokon ni tobang-tobang i, pala markakauak sabungan pukul 10 borngin,” ning Si Siti na madung gulang i ambirang ni alaklai nia.

“Ra peto, ra inda. Ima nanipamanat-manati ompung-ompung najolo,” ning Si Imran.

“Oi baya..nagoso mantongani tile,” ning Si Siti.

“Ima so ipatogos iman. Ipabahat aqidah, i bagas niba, tu daganak bage, so ulang ro na marparange ni dosa,” ningia.

I sogot ni ari, nalao Si Imran tu arangan nangkan manaha soban tasir. Boal mangan arian soni aek inumon ambe-ambe i abarana; lading nanisarungna olit i ak nia; kapak tiop i tangan siamun.

Bona ni apea na madung made tibal na marumbak i kobun gurison i do nanilobong-lobong nia dohot kapak. Dung tarlobong, nanibongka-bongka muse sagodang ni bitis, ima soban tasir na giot gadison tu pamuge soban i huta.

Ngada bona ni nasihil na pade mamben soban tasir sipagaraon, angkon bona ni apea do so tama. Harana momo oni deges garana, soni muse banggarna hum deges tingon bona ni ayu nasihil. Tasiron boti bongka-bongkaon pe hum lidang-lidang, inda marpekok-pekok boti marpudor-pudor. Ima so halak parlopo pamilas aek boti manggoreng pisang sanga pamasak kotan somalna tu soban tasir na tingon bona ni apea do na tamana.

Tar 100 tasir itasir-tasirna. Dua noli oban do sudena, ima 50 tasir sakobetan nanikobet dohot andor natogos. Naniporsanna manganjak satonga dalan, ima nanipatibalsa i toru ni bona ni apadan paradianan ni halak tu arangan. Dungi ialapsa muse 50 tasir nai tu pantasiran an, iobansa tu panibalan i paradianan i. Dung salose maradian, ipalalusa mamorsan na kobetan 50 tasir i tu huta. Marayak pukul 5 ma sudung na ia pataru na 50 tasir nai i tu huta. (marsambung)

Comments

Komentar Anda

Silahkan Anda Beri Komentar