Budaya

MARSIDAO-DAO (episode 18)

Marsidao dao grafis
Marsidao dao grafis

Novel Mandailing

Nanisuratkon : Dahlan Batubara

Dung kotu Isya dohot Si Poso mangiutkon amang nia tu bagas ni Si Maramis ima nangkan manaktak sibodak dohot mambongkai arambir nangkan gule markorja ancogot. Dung do mijur tingon bagas, les na tu sibodak namalamun do na adong i bagasan ni roa nia, harana dompak orja i bagas ni amangtua nia Si Borkat nasolpu adong do tar tolu sibodak namongkol na pupu ileheni amang-amang namanaktak i tu daganak-daganak.

“Adong do sibodak nalamun on, Aya?,” ningia loas mangudur amang nia.

“Inda binoto. Ra adong, ra inda. Pala adong, ulang bahat papangani so ulang mancit boltok” ning amang nia.

“Olo, Aya. Aso langa ilehen tu daganak pala adong sibodak nalamun,” ningia.

“Harana, pala mongkol sibodak i, inda tarbaen guleon,” ning amang nia.

“Inda tabo langa igule i?,” ningia.

“Lamlam ro daina pala namongkol, ima so namata do tu gule,” ning amang nia.

Dung do kalas lima sikola dasar Si Poso, napupu ma ioban Si Imran daganak nia i tu namanaktak sibodak, so tumibu ibotona ise-ise koum sisolkotna boti kahanggina. Anggo namarmora boti maranakboru ngada pe tolapsa mambotosa.

Marompung ma si Poso tu Maramis, kahanggi sisolkat ni alai. Harana dompak manopot kahangi najolo amang nia i huta i, tu bagas saudon ni alak Si Mulkan ma topotonna. Si Muklan dohot Si Maramis marangka maranggi dohot Si Tajuddin; adong 5 iboto ni alai ima Si Mariamah, Si Mastiara, Si Masniari, Si Darisah dohot Si Mardiah.

Sonima na mar huta i luat ni Mandailing, na markoum marmora markahanggi maranakboru ma na marsipaturean bope na i siriaon soni siluluton, angkon nanipatandaon do tu daganak niba so mamboto. Ima adat naniobankon ompung-ompungta tingon najolo.

I jolo bagas ni Maramis i, bahat ma poso-poso boti amang-amang naposo marsikatutu marsibaen patureonna. Adong na paias arambir tingon sabutna, adong namamboa arambir, adong namanaktak sibodak. Inang-inang adong na kehe mambasu dahanon tu pancur kulak ni musojid an, adong muse namangodohon kotan sipulut dohot manggaor-gaor intina.

Si Poso dohot daganak sapangkekna na pupu mangan-mangankon sibodak namongkol ilambung ni alak namanaktak sibodak i.

I bagas i, bujing-bujing marsikatutu muse pature gaba-gaba i bagas i. Oni, Maramis dohot angkangna Si Muklan manorangkon goar-goar nanitulis tu poso-poso naipas langka nagiot kehe pataonkon orja i, ima napataonkon tu koum-koum sisolkot boti koum nadao, ima na adong i huta i boti i huta balian. Harana dung isuratkon goar-goarna, bahat dope poso-poso i naso mamboto ijia bagasna, mari-ari na i huta balian. Anggo na i huta i, deba maia naso mamboto.

“Hollad Lubis banjar Sotul on ijia do bagasna on, Tulang,” ning sada poso-poso.

“Ompongkon ma ibamu, koum mu pe nga binoto ho. Amangtua mu dei, bagasna i lambung ni alak si Kuklom i, anakna margoar Ammar sanga pe Si Kariting,” ning Si Muklan.

“Oh olo, Tulang, ma uboto, tuak ku ma langa i, alaa,” ning poso-poso i laos manggoma ulu sareto manjoling tu bujing-bujing na pature gaba-gaba i, na mikim-mikim martata mangaligina.

“On amangtua, namargoar Solihin i Desa Rumbio on, ijia mon bagasna, Amangtua,” ning poso-poso nagiot tu huta balian.

“On antong i banjar Kelapa i don bagasna, marsapa ma homu naron i lopo na i sirpang tolu, sirpang paduana dei dung masuk tu huta i,” ning Si Muklan.

“Olo, Amangtua,” ningia. (marsambung)

Comments

Komentar Anda

Silahkan Anda Beri Komentar

Situs ini menggunakan Akismet untuk mengurangi spam. Pelajari bagaimana data komentar Anda diproses.