Home / Budaya / MARSIDAO-DAO (episode 20)

MARSIDAO-DAO (episode 20)

Marsidao dao grafis

Marsidao dao grafis

Novel Mandailing

Nanisuratkon : Dahlan Batubara

Dung sidung markobar-kobar i namangido asaya i bagas ni Basiron i, marmulian ma anakboru boti kahanggi soni muse koum na sihil boti muse lunggu banjar. Tai barisan ni parkahanggian les na tading dope, ima nangkan namartahi saudon.

Madung songoni adatna, alai namarkahanggi marlagut do mulak dung sidung mangido asaya, ima nangkan mangarumbukkon tahi asa pokat satontang parkahanggian. Nangkan iobari ma aha-aha nasosak iobari. Uali, udon dohot panjamahan ni parkahanggian; bahat ni tumpuran tu siriaon santak tu siluluton; songoni muse aha na adong ibagasan ni roa niba nangkan ison ma iobarkon so ijalakan pokat dohot tahina nangkan idalankon i uhum ni parkahanggian.

Daganak ni kahanggi na madung poso-poso tai ngada pe unjung mungkap tu siriaon boti tu siluluton ma sada naniobari i parlagutan ni parkahanggian i, harana masona ma sugari poso-poso i mandohoti i horja bope i amalangan so mur ibotosa adat na mar huta soni muse namarkoum markahanggi, harana les na alai do aduan ni ari napalalu boti na mandalankon adat muda madung jumolo natobang-tobang i.

“Upamatai, ngada sajia sannari poso-posonta namarroan tu siriaon boti i siluluton,” ning Jamancari. Jamancari on ma alai natobangna i barisan ni parkahanggian i. Ise natobangna i parkahanggian, ia ma nangkan mangobankon parpokatan boti parsitiopan ni parkahanggian.

“Imada, Amantua. Songon orja ni uda Muklan poken nasolpu pe uida ngada jabat saparlima poso-poso namungkap, songoni muse amalangan i bagas ni amantua Badar sabulan nasolpu” ning Sami’un.

Ibul ni tahi satontang poso-poso i : amang-amang na adong daganak poso-posona boti boru bujingna anso iobansa ma tu siriaon boti siluluton. Satontang panjamahan ni parkahanggian ngada pe masona itambahan, soni muse partumpuran i siriaon dohot i amalangan les sai dope : salapan takar dahanon dohot epeng 10.000 rupia tu siriaon, opat takar dahanon dohot epeng 5.000 rupia i amalangan.

Dung satahi sapokat alai sudena, iobarkon Muklan ma satontang Si Imran i pantar bolak i. Ima nagiot mangalao maroban daganakna dohot dadaboruna mangulangi ompung ni daganakna na adong i Bilah.

“Bo baya, olo da. Dua bagas ma pinomat sugari mandongani alai so bahat tondi ni hakouman sian hita maroban alai tu Bilah” ning Jamangkutur.

“Aropku, ami tingon bagas ma sada. Harana, salaku amang topotna i huta on, tontu les johoman ma ami tingon bagas,” ning Muklan.

 “InsyaAllah, au ma dohot boru ni uda tambana, harana pas muse nagiot mangulangi Bou Romlah ami i Aek Kanopan, sadalan sauduran ma uida on,” ni Sarimuddin.

“Jaut mai, dua bagas madung rami goarna, tai pala adong dope namarkagiot mandongani dohot adong alapanganna, ngada maua, so mur marami” ning Jamancari.

“Andigan ma ira-ira nalangka tu Bilah, nga sabinoto anta adong alapangan nami tingon bagas,” ning Jamalarat.

“Aropku, ari Kamis poken na ro ma soni ning Angkang, suada halanganna” ning Imran.

“Bo, anggo songoni, dohot ma ami, harana ari Kamis on lapang do ami suada halanganna” ning Jamalarat.

Rumbuk ni tahi, alai tolu bagas ma mandongani alak Si Imran sabagas tu Bilah, ima namaroban daganak na tu ompung nai, ima amang-inang Si Siti dadaboru si Imran. Tarlobi-lobi on dope nangkan parsuoan ni dadaboru nia i dohot aman-inangna dung do marbagas alai, marbagas naso ipatola ni amangna. Soni muse patidaon daganakna tu saudarona, harana dung do iobansa dadaboru nia i tu luat Mandailing, ngada be unjung ia mangulangi saudaro nia i Bilah. (marsambung)

Comments

Komentar Anda

Silahkan Anda Beri Komentar