Home / Budaya / MARSIDAO-DAO (episode 21)

MARSIDAO-DAO (episode 21)

Marsidao dao grafis

Marsidao dao grafis

Novel Mandailing

Nanisuratkon : Dahlan Batubara

Muli tingon bagas Basiron i, iobarkon ia tu dadaboru nia nangkan poken na ro ma alai mangalao tu Bilah.

“Alhamdulillah, bahat ma ita soni nalao tu Bilah. Oi baya, jop doma roangku, jabat tolu bagas kahanggi mandongani ita,” ning dadaboru i.

“Imada, syukur ma ita. Harana mur martondi ma ita na jalang on muda bahat koum kahanggi mandongani,” ning Imran.

“Imada, mudah-mudahan markairasan alai i Bilah. Martarimo ita tu alai,” ning Siti salaos pature bantal dohot ulos ni alaklaina.

“Mudah-mudahan. Rap mandoa ma ita. Dungi, pala tolu bagas mandongani, boti muse adong natobang tontu marbajora ma tarida tu Tulang soni tu Inangtulang aroronta. Boti muse daganakta madung magodangi, onma dalanna alai margodang niroa manjagit aroronta. On ma partimbangan ni kahangginta ima so tolu bagas alai nangkan dohot mandongani,” ning Imran.

Manyogot nai, udan rimbus-rimbus mambaen litak ni tano i alaman ni bagas i. Bulung ni bunga sipukulopat tarida marillo-illo manetekkon aek ni udan manabu tu karekel itoru bona ni bunga i. Si Poso juguk dohot amang nia i tangga ni bagas i mamanat-manati tu alaman. Inang nia juguk i pudi ni alai i pantar bagas i mangaligi utu ni si Pikek.

Bope ari Akad ari mangguris, ngada kehe alak tu kobun gurison ibaen udan rimbus-rimbus naso mantak sian kotu Subuh.

Dua alak inang-inang marsaung-saung anduk mamolus tingon alaman i, maripas-ipas so ulang jabat rem-rem pamatangna mamolus udan simbur-simbur i.

“Maradian jolo, Eda !!,” manjoung si Siti.

“Olo, eda. Nagiot tu ruma sakit do ami mangaligi aya Si Marlan malariaon !!,” ningna mangalus.

“Bo baya, andigan dei tu ruma sakit !!,” ning Siti.

“Naborngini, Eda !! Kehe mami,” ningna manjoung laos palalu alalaona.

“Olo, Eda, palan-palan !!,” ning Siti.

“Tarbahat ma na maraun malaria ubege,” ning Imran.

“Imada. Amangboru Jamal aya si Koddam pe ma tu ruma sakit ma tolu ari nasolpu,” ning Siti.

“Imada, musim malaria muse ma baya muse,” ning Imran.

“Si Andong donganku pe marun do ia aya. Ma marsuntik ma tu mantari Dapot,” ning Si Poso.

“Bo baya.Mudah-mudahan sigop murakna,” ning amang nia.

“I Bilah adong dei arun malaria, aya,” ning Si Pikek.

“Adong, tai um sonting i son malariana. Harana tarbonggal do i luat Mandailing Godang on nagogo arun malariana. Ima so adong ibaen Willem Iskander i buku nia satontang malaria,” ning amang nia.

“Olo, dapot au dei puisi nai, Aya….Muda ro sirumondap udan / Magodang ma batang ni aek / Dibaon sompit hadabuan / Jadi tu darat doma manaek. I ma da, dongan, dalanna / Anso Jadi bonca-bonca / Holas na haruar tingon bagasan / Arun sajo do diobansa,” ning Si Pikek mangobarkon puisi ni Willem Iskander.

“Oii..malo doma ho inang,” ning inang nia. Marmikim-mikim doma si Pikek ibaensa.

“Ayah, kehe ma ita langa tu ompung na i Bilah, poken na ro?,” ning Si Poso.

“Olo, Amang. Ita sudena kehe. Dungi rap do ita dohot ompung dot amang-amang tua mu,” ning Imran.

“Ma adong langa epengta mamben tambang motor tu sodun, Aya?,” ning Si Poso.

“Olo, Amang. Alhamdulillah madung bisa ita tu ompung man,” ning Imran.

  “Anggo soni, udokon ma tu dongan-donganku nagiot kehe ita tu ompungan, harana inda dong ningkalai ompungku antong,” ning Si Poso.

“Nga pola i, Amang. Imaia ulang jabat manyombong iba. Inda tola paginjang roa, inda tola patidaon agabean, harana inda ipatola agama. Gusar do tuhan i jiba pala puraga iba tu alak. Harana, deba madung inda marompung be dongan niba i ibaen madung jumolo ompung ni alai. Ima so inda tola palagak-lagakon baen adong ompung niba, mamben ancit ni roa ni dongan i do  iba. Ulang jabat mancit roa ni dongan partunda niba,” ning Imran.

“Olo, Aya. Imada, Si Borgo ngadong be baya ompung nia, madung maninggal antong. Au pe ibo dei roangku tusia pala irisak dongan-dongan nami,” ning Si Poso.

“Kan, ima bo. Ima so inda tola mamben ancit roa ni dongan,” ning Imran. (marsambung)

Comments

Komentar Anda

Silahkan Anda Beri Komentar