Home / Budaya / MARSIDAO-DAO (episode 22)

MARSIDAO-DAO (episode 22)

Marsidao dao grafis

Marsidao dao grafis

Novel Mandailing

Nanisuratkon : Dahlan Batubara

“Adong do etek nami sanga tobang nami i, umak?,” ning si Pikek.

“Adong, etekmu sada, goarna Laila, umur nia 30 taon mei sannari. Tobangmu indadong harana umak ma nagodangna adaboru. Mamakmu sada, tai mariganan i tano ranto do, tinggalna i Kalimantan,” ning umak nia.

“Etek Laila mi, tar suang dei tompana dohot umak muyu,” ning Imran.

“Oii, por roangkau mangaligi etek,” ning Si Pikek.

“Olo, umak pe malungun do tu etek muyu. Rap mandoa ma ita so lalu na jalang tu Bilah,” umak nia.

“Bou nami adong dei?,” ning Si Pikek.

“Bou muyu tolu, uda muyu sada. Alai sude tinggal i Bilah. Tai ompung muyu ngada dong be, madung jumolo dompak menek aya najolo,” ning Imran.

“Pala lalu ita jalang tu Bilah, kehe juo dei ita tu bou dohot uda muyu, so marsitandaan, so itanda alai homu, so itandai homu uda dohot bou-bou muyu. Soni muse daganakna, so marsitandaan humu sudena namarsaudaro, na mar eda, mar ompung dongan, mar anaknamboru. Dungi ziarah tu kuburan ni ompung muyu pe kehe dei ita. Ibaca Yasin tu arwah ni ompung niba, ipangidohon tu tuhan so ipalapangNa ompung niba i kubur, ipadao sian sikso kubur. Doa doma naterlehan ita tu alai na madung jumolo. Harana alai pe na pupu dei painte doa tingon ita sian ginjang ni dunia on,” ning Siti.

Udan naso mantak dope, ima udan simbur-simbur ni manyogot, mambaen ngali tu pamatang. Pala iligi tu nadao rabun-rabun do tarida bulung ni arambir soni muse bulung di adungdung. Arangan nalampas i dolok an pe madung mago sian pangaligian ni mata, ima namago isanggopi udan. Ima so les isi alai juguk, mamanat-manati udan simbur-simbur sareto mangecek-ecek pasada roa, na marlagut sabagas, na marlugut painte siang ni udan.

***

Mur ma bahat do alak i huta i dohot huta balian na ona arun malaria. Inda na ibaen udan, harana maso on tarjarang do ari marudan. Tai, sonima dompak masona, maso tarbahat alak ona malaria. Musin malaria ning alak Mandailing saro sannari. Musim malaria sanga wabah malaria saro Malayuna, epidemi saro ni alak Yunani, Eropa. Sapetona madung adongdo 20 taon onokna naso musin malaria. Harana na 20 taon on ngada sadia alak na malariaon ibagasan ni sabulan, ipe sigop do malumna.

Tonga borngin muta mongkik sikatutu Si Imran i tingkap bagas i. Marnoli-noli muta mambaen pamatangna lambok ngada margogo be. Ganop muta napupuma ipisat-pisat dadaboru nia i tangkuhuk nia dohot tangan siamun salaos maniop mangkuk marisi aek milas inumon ni alaklai nia i i tangan siambirang.

Dung tu podoman i, iulosi ia alaklai nia i dohot ulos apal itambahan dohot ulos abit, harana lumobi ngali ilala Si Imran pamatang nia. Marayak kotu Subuh dope so mutur situtu pamatang nia, mutur ibaen matondik na lumobi tondik, ima namatondik santak mambaen ngiluan tu oli-oli ni gurung-gurung i. Matondik naso taruraki ibaen ulos, matondik naso mantak ibaen milas ni adang ni api, ima namatondik ibaen malaria, goarna malaria plasmodium falciparum.

Manyogot ni ari doma so ioban Si Siti alaklai nia i markundung-kundung abit tu parsuntikan ni mantari an. “Onma inum komu tolu noli sadari dung sidung mangan,” ning mantari i salaos mangalehen dua papan pel, sada papan kaplet, sada papan kapsul tu si Siti.

Adong do opat alak namarubat i parsuntikan i, opat-opatna marun malaria. Muli tingon parsuntikan an, tarbege i masojid boa-boa namamboaon na madung jumolo namargoar Maruli Lubis umur 54 taon na mian ibanjar Ayuombun, ima najumolo i pukul 5 kotu Subuh i, nangkan ipataru tu kuburan dung luas Zuhur. (marsambung)

Comments

Komentar Anda

Silahkan Anda Beri Komentar