Home / Budaya / MARSIDAO-DAO (episode 33)

MARSIDAO-DAO (episode 33)

Marsidao dao grafis

Marsidao dao grafis

Novel Mandailing
Nanisuratkon : Dahlan Batubara

Sora ni lonceng ona potuk-potuk tarbege, mandokon alai mangaso marsiajar. Mararuaran daganak-daganak sikola i marlojongi. Adong na kehe tu parjagalan i manabusi panganon sipanganon. Pala na donok bagasna tingon sikola i, taru tu bagasna do kehe nangkan mangan indahan.

Si Poso tu parjagalani do mangalao. Tarpaida tu ibana Si Pikek dompak mengela Si Rahim tingon anggunan i.

“Tangis do ia,” ning Si Poso.

“Inda, tai ngot do uida. Pas ngot roangku. Tarsonggot ia ningroangku dung bahat alak,” ning Si Pikek salaos pajuguk anggina iampuanna.

Sulang-sulang Si Pikek pamangan anggina dohot indahan nanioban tingon bagas manyogot i. Sasanoli iaumna indahan i, harana tuk do parbahat ni indahan i pala dohot ia manganna. Ngada kehe epeng nia panabusi panganon i parjagalan i be. Mari-ari tarontip ma epeng ibaensa. Si Poso antong laing mangan mik do, mik kua namartuor 1000 rupia satapak.

Sidung mangan i, iompasa anggina tu gadu saba nanipudi sikola i mangihutkon dongan-donganna. Marjuguk-juguk i lambung saba i, marangin-angin na laing bubus tingon tonga saba mambaen sibuk tagi nibaensa.

Sonima daganak na sikola. Dompak maradian ma alai manjojal boltok dohot panganon i parjagalan i. Ngada tardokon rongomna i parjagalan i marsitabusi sitabusiaonna, marsipangan sipanganonna. Dung mangankon, adong ma na kehe tu topi saba nanilambung sikola i marjuguk-juguk. Angke saba dope uliling ni sikola i. Adong muse na kehe tu bondar an kodo hajat nagodang sanga kodo hajat namenek. Pala mangkuling lonceng, markehean muse ma alai mulak tu kalas i nangkan marsiajar.

I tonga ni ari i, na ro ma Si Manna parjagal i mandokon na miting Si Rahim i anggunan. Tarsonggot Si Pikek mambegena laos manjoling tu guruna. Sude dongan-donganna namanaili doma tu ibana.

“Inda maua dabo, Inang. Kemani soni pature,” ning guru i tu Si Pikek.

Mangalao Si Pikek aruar. Tolap tu parjagalan i, na tangis do si Rahim i anggunan loba i. Ielana anggina tingon anggunan i, dungi iobansa tu bondar kenek na i julu parjagalan i. Dung sidung ipaiasna pamatang ni anggina, ipajuguksa i ginjang gadu simin bondar i so tarceng-cengsa saraor ni anggina i aek i.

Dung ipaombangsa saraor i i ginjang ni alopa, iobansa mulak anggina tu parjagalan i, nangkan manyaraorina. Ilehenna minum dompak so ipagulungsa mulak tu anggunan i.

Ngada ra Si Rahim tarpodom bope na pupu ibue-bue angkangna boti parolo-olohonna. Angke nanibaen namodom i tingon manyogot mambaen matana ngada ra mamitpit.

“Etek ma dabo manganggunna, so bisa ho tu kalas i mulak,” ning parjagal i.

“Olo, Etek. Tarimokasi ma tu Etek,” ningna sereto manadingkon anggina i anggunan i. Inalao kehe i angkangna, na tangis muse ma Si Rahim mangaligi angkangna manadingkonsa. Harana tarpaida do tu ibana sian bagasan parompa panganggun i parkehe ni angkang nia i.

Namarilu-ilu do mata Si Pikek nalao tingon parjagalan i mambege tangis ni anggina. Tai, ngada tardokon bage aha, angke madung dompak songonon gorit ni angoluan. Gorit ni naso maramang, namambaen inang nangkan ganop ari mangomo namamparkayaon daganakna.  (marsambung)

Comments

Komentar Anda

Silahkan Anda Beri Komentar