Home / Budaya / MARSIDAO-DAO (episode 47)

MARSIDAO-DAO (episode 47)

Novel Mandailing

Nanisuratkon : Dahlan Batubara

Marsidao dao grafis

Marsidao dao grafis

Laing ikusandarkon dadaboru ni Muklan i do sibuk ni Si Siti tu indorana painte becak masin marobanna. Dadaboru ni Mahlil margoso palagut parabiton ni Siti nangkan obanon tu ruma sakit. Si Rahim iambit ombar balok ni alai.

Poso-poso na manjalahi becak i, marlojong maripas tu dalan godang an. Dung giot tolap tu topi dalan i, tarson-son do poso-poso i dohot motor ni ompung Si Poso i. Sian bagasan ni motor i, tarpaida tu Si Isrot poso-poso namarlojong i. Nibaen ombar balok bagas ni Siti i do poso-poso i so tarsonggot Si Isrot, anta na sanga maua do Si Siti, ning roana.

“Tujia do ho i, Torkis,” ning Si Isrot tingon bagasan motor i mamio poso-poso i.

“Ala..abang do langa i, pingsan umak Si Poso, isuru tuak Muklan au mangalap becak marobanna tu ruma sakit,” ning poso-poso i.

“Bo, pala nangkon be alap beca i, motor on ma marobanna, kema ita tu bagas an,” ning Isrot.

“Olo, Bang. Lao mau soni,” ningna.

Iobarkon si Isrot tu alai na ibagasan motor i arun ni inang Si Poso naso manyodarkon ibana sannari i bagasna. Na martangisan doma si Poso dohot Si Pikek mambegesa.

“Umak..eee,” ning Si Pikek tangis mangangguk. Nanialuk ni bijingna doma sibukna so merer tangisna.

Tolap motor i tu jolo bagas i, tarpaida alai halak na jaji rongom i jolo bagas ni alak Si Poso i. Taru mangambur doma Si Poso tingon motor i marlojong tu bagasna. Ompungna pe na maripas langka marsosak manaek tu bagas. Si Pikek laing ialuk bujingna mangalo tu bagas i.

Namangangguk bangar do Si Poso dohot Si Pikek mangaluk inang ni alai na ikusandarkon tu indora ni dadaboru ni Muklan i.

Ompung ni alai matunguk-nguk na mardabuan ilu ni matana mangapus-apus ulu ni Si Siti. Ipamanatisa tompa ni boruna, na dao marnyiang sian na solpu dompak so mangalarion ibana tingon Bilah. Tompa na mangguratkon gurat-gurat ni amalaratan.

“Oh baya anakku,” ningna mangapus boi ni boruna. Boru na nihaholongina. Bolasan taon ngada marsuo, bolasan taon manjalahi asa painteon, iparsuoan on na mamitpit do mata ni boruna namarsituhuk i amalaratan ni ngoluna.

“Kita ke rumah sakit, sekarang ya, Bu,” ning Isrot.

Ioban tongkin i tu ruma sakit. Dung i ruma sakit, sada dokter paresona. Sidung i, ipaimbar tu sada bilik. Isi ma sibuk Si Siti ipagulung.

Na isi do alai sude manjagoisa. Soni muse Si Hamzah dohot Muklan boti Si Isrot. Ompung Si Poso laing juguk i siamun Si Siti, na laing mangapus-apus ulu ni boruna. Si Poso dohot anggina juguk marombar dohot bujingna.

Ngada pe sada roha ni alai pasari-sarina. Marmarsak ni roa boti mardangol mamanat-manati Si Siti na laing gulung i asur rosbang ni ruma sakit i, naso muda-muda manyodar dope tarida.

I pukul 10 borngin i ma patorang mata Si Siti. Na marjop niroa doma alai sudena mangidasa. Marsipadonok alai tu rosbang i.

Dung matorang akalna, iligisa i siamunna inangna na juguk maniop tangganna.

“Mak,” ningna lambok.

“Iya, Nak. Ika omak, Nak,” ning inangna salaos mangapus obuk ni baruna.

Iligasa tu siambirang ni inangna, tarpaida tu ibana anggina Laila jong-jong mangaluk Si Pikek.

“Enen adekmu Laila,” ning inangna.

Ipadonok Laila tu angkangna salaos paunduk sibukna mangaluk angkangna.  (marsambung)

Comments

Komentar Anda

Silahkan Anda Beri Komentar