Home / Budaya / MARSIDAO-DAO (episode 6)

MARSIDAO-DAO (episode 6)

Marsidao dao cover

Marsidao dao cover

 

Novel Mandailing

Naisuratkon : Dahlan Batubara

Tai, songonjia mantong ibaen, soni dope dompak hangoluan ni halak na mian i Indonesia on. Gonanan do pamarentah i tarida pature demokrasi ni halak Barat i umpado pature ekonomi. Pamilihan DPR pe nabahatan kehe epeng ni alai, santak mar milyar bahatna, dung juguk i karosi i manangko ma alai panggarar ni epeng na madung kehe. Pala ngada marbadai DPR dot paresiden nai, namarsipajiaran do. Ngada tu pajongjong paberik ban be roa ni alai, sonjia so mulak epeng i doma opkopon ni alai. Ulang majolo i, hum dalan Lintas Sumatera pe ngada tarpaturesa.

Soni muse tu gubernur dohot DPRD na, taru namarsilotapan doma alai marsiradu mangarek-rek epeng ni APBD i mambaen paulak epeng naipake dompak Pemilu Legislatif soni muse Pemilihan Gubernur. Ima pambaen ni demokrasi i, harana indape johomna ita mardemokrasi, mari-ari demokrasi liberal, mur tu segana do, harana demokrasi epeng dope naro. Ise nabahatna epengna ia do najuguk, bope naso malo, bope naoto-oto ipajiar ma soni angke bahat epengnia manggarar alak nabahat namamili i.

Songonjia mantong ibaen, harana demokrasi liberal ngada mangetong ise namalo boti nabisuk; ngada mangetong isi ni utok-utok na ibagasan ulu, tai mangetong ulu do. Naso marutok-utok pe tola juguk pala bahat epengna. Nabisuk boti namalo ngada tola juguk i DPRD an harana ngada bahat epeng ni ia.

“Adope inang…!!!, tarmura do ibaen tuorna…!!! tabo-tabo gulaenna..,” ning Si Muklan tu halak namarpoken namamolusi i jolo ni parjagalan nia i. Terbege tu Si Imran sora Si Muklan tingon balerong i laos tigor ma alalao nia tu parjagalan gulaen Si Muklan i.

“Assalamu’alaikum, Mamak,” ning Si Imran.

“Walaikumsalam, bo homu dei bere,” ning Si Muklan.

“Olo, mamak, bahat do nian panggadisan gulaen sadarion, Mamak?”.

“Ala baya, ngada sajia targadis, angke dompak masona namarsuadahan halak nabahat. Ampe tartuor dahanon dohot balanak budu doma halak, ngada pasari-sari gulaen be baya,” ning Si Muklan laos mamirpiri gulaen laut i so ulang sigop madayuk.

“Aha nangkin dalan muyu ro tu peken on, Bere”.

“Mar Anatra nangkin, Mamak”.

“Songonon ma, Bere, ngada unjung be bahat alak namarpoken. Angke sude dompak marsuada. Pamanat-manati ma dadaboru-dadaboru namarjagalan, les bahat be dope jagalna,” ning Si Muklan.

“Imada uida, Mamak. Songon au mantongbo, ngada adong roangku nagiot manabusi, angke iba pe nakolet juo do,” ning Si Imran.

“Olo, bere. Naupaotik do gulaen baen jagalon, bope songoni les kolet do manggadiskonna,” ning Si Muklan.

Sonima alai sipamuge boti siparjagal, dohot do alai nakoleti ibaen tuor ni gota namura. Ngada sipangguris sajo nakolet, ona do sudena. Nangkin pe dompak i motor Anatra i, les parsuadahan i muse do naiobar-obari. Songoni muse parmotor i namandokon akoletan ni ia harana ngada bahat alak namanaek motor na tu jae boti na tu julu. Daganak namarsikola doma opkopon ni alai parmotor i so les adong epeng tarpalagut. Pala tanggal narara boti namangaso sikola, namarkancit ma baya parmotor tambang i.

Angke, halak i tano Mandailing hum bahat do sipangguris umpado naso mangguris. Tingon Mandailing Julu, Mandailing Godang santak tu Mandailing Angkola bahatan sipangguris do pangomoan ni halak. Ima so nabahatan sikarap tingon Mandailing tu Medan nangkan obanon tu ruar nagori. Iekspor ningna pandok saro Indonesiana naibuaot tingon saro ni halak Eropah. Sikarap na tingon Mandailing na tu Medan madung martukar ma tompana tu tompa ni SIR ima naitukar dompak i remeling. (marsambung)

Comments

Komentar Anda

Silahkan Anda Beri Komentar