Home / Budaya / Parsuadahan Ibaen Gota Namura

Parsuadahan Ibaen Gota Namura

Parsuadahan Ibaen Gota Namura grafis

Parsuadahan Ibaen Gota Namura grafis

Nanisuratkon : Dahlan Batubara

“Naso dong do da guleonta naron borngin, aya ucok. Anggo bulung gadung nian adong do ucalong pe naron ibalakang bagas on, pangaroncana do naso dong,” ning si Jaleha tu alaklai nia Si Dalkit.

“Ngadong epeng i tanganku, ulang majolo panabusi balanak, tambang ni daganak sikola pe naso adong be ancogot manyogot. Epeng panggadisan ni gota poken nalewat pe manyogoti ma abisna. Ma abis antong eme jomburon, bahat epengta kehe panabusi danon,” ning Si Jaleha.

Marsak mantong ilala Si Dalkit, mari-ari muse epeng pe ma suada ma, adong icakuk nia tar tolu ribu nai doma, ipe panabusi sigaret mar batang dot tes paet doma natolapna i. Ari poken ari Kamis pe tolu ari nai so tolap, harana ari Kamis do martimbang apea, ari Rabu mandaek apea.

Sangajo nakolet ma sannri ilala Si Dalkit. Dung do mura arga ni gota, ma kolet sudena. Sanga andigan doma tarpanek pamarentah arga ni gota, so lapang doma mulak. Tamba ni usao pentong inda pedo adong binoto Si Dalkit, kotidak sugari les lapang ma angoluan.

“Jadima, umak butet, uadongkon ma jolo,” ningia tu adaboru nia i.

Kehe mada Si Dalkit tu saba an maroban ember namenek dot goluk. Basaen antong les olit ma i abara nia dot abit sumbayang. I roa nia na giot manjalai talaga ni tobat mon baen timbaon, nga sabinoto bahat gulaen i talaga ni tobat na giot arsikon nia.

Adong ma tar sabolas talaga naipareso nia, tai songon naso dong do nida ia tando-tando margulaen. Bia mantong, alak namanarapo sanga manyentrum pandokon ni saro sonnari ma bahat. Abis doma gulaen ibaen na itarapo ni alak i sajo, soni juo talaga-talaga ni tobat.

Di lopo pe ma jot-jot mei iobar-obari alak tarapo on. Bahat do binege margoyak niroa alak i tu alai partarapo i. Harana antong, dung do adong alat tarapo, mur urak do gulaen i bondar-bondar saba soni jua i batang aek ni kampung i.

“Sangajo peto do antong, ma sabolas talaga na upamatai, taru adong suada gulaenna. Sangajo nasonting mada pambaen ni tarapo on. Giot mambuot gulaen pe iba, ngadong gulaenna,” ning roa Si Dalkit sada-sada ia di sopo saba dompak maradian pasari-sari naso dong gulaen on.

“Pinomat dabo sugari tuk tu gule tolu ari pambahat ni gulaen dapot au sadarion, dungi antong manggadis ma au deba so les adong epeng tiopon. Mari-ari tambang ni daganak tu sikola angkon na adong 6.000 sadari,” ning roa nia.

Dalan ni epeng pe ngadong nabinoto ia, di ari on manjalaki gulaen maia na momo iraso ia baen gadison dohot guleon tu bagas. Satampul dua lancim, ningna. Guleon adong, epeng dapot. Dungi, copat muse karejona, tobot-tobot talaga ni tobat on, timba sampe marsik sobaru dehe gulaen nai. Salose. Mulak tu uta, sadebana paasing i bagas baen guleon, sadebanai gadis tu topi dalan an. Soni ma angan-angan nia.

***

Tar ginjang ma alilu, tando nagiot kotu Asar ma, tai Si Dalkit les na pupu dope manjajo i saba an manjalai talaga ni tobat namargulaen.

Dompak namanjajo i, mamintas ma ia sian kobun arambir. Tarida tu sia Ompung Landong na juguk di sopo na. Maradian Si Dalkit antong tu sopo i, harana ma manguas, anta adong dope aek inumon ni Ompung Landong.

Dung ilehen Ompung Landong i inumon, tarligi ia ma tu ginjang, bahat tarida ia arambir natobang ganop batang. Isapai ia Ompung Landong sanga tola do ia paijurna, upana sada arambir sabatang. Dungi, icaritohon ia kakoletan nia, ima so maribo niroa Ompung Landong tu sia.

“Imada, muloi tuari inda na mar na ro parbodat i paijurna, ma marpokat ma ami boto. Tai pala gogo do roamu paijurna, jiarma, paijurma. Bo aha ibaen ko paijurna, ngana maroban bodat ko” ning Ompung Landong.

“Au panaekna, amantua,” ning Si Dalkit. Sigop ni carito, bup bap mada ibaen Si Dalkit arambir i. Ira-ira pukul 5, adong ma 15 batang na ipaijur Si Dalkit. Adong dope 10 batang nai naso ipaijur. Ro pandok ni Ompung Landong, ontat sai majolo ipaijur, harana inda taroban naron sude pamulakna tu uta.

Marpokat alai, sanga sonjia do mangubak dot maroban arambir on tu uta. Simpul ni tahi, Ompung Landong deba mangubakna, sadebana iubak Si Dalkit. Dungi antong, manaru arambir i sudena tu uta si Dalkit juo pokatna. Nasapulu batang nai ipokati nangkan ipaijur Si Dalkit muse sudena.

“Bope soni, mangido tolong au tu amantua, pala muli naron amantua, isuru amantua majolo naipas langka tu bagas nami mandokon so ro parmaen ni amantua dohot daganakku nagodangna manolongi au tu kobun arambir on. Dungi mangido tolong muse au, ipasolangkon amantua ma jolo tu parmaen ni amantua epeng 5 ribu so adong panabusi balanak tutungon,” ning Si Dalkit. Iolohon Ompung Landong antong.

Margoso ma alai dua mangubak arambir i. Ira-ira pukul tonga onom antong, mulak ma parjolo Ompung Landong.

“Parjolo ma au. Oni adong dei lampu juguk ibagasan sopo i, panait naron so tarida jamaon,” ning Ompung Landong.

Si Dalkit antong ipatorus ia manaek nasapulu batang arambir i. Taru na bup bap muse ma. Ira-ira pukul 7 ma salose ia paijur arambir i sudena. Tolap muse mantong adaboru nia dot anak nia nagodangna, kalas 1 SMA, goarna Si Pahrul. Maroban senter, lampu juguk, lading sada be dot indahan i rantang si dua tingkat. Sumbayang Magorib parjolo Si Dalkit sobaru mangan.

Pasari-sari bahat ni arambir i, marpokat ma alai marbagi karejo, harana adong do lobi 280 sudena, mar tonga borngin mei so salose sudena tar taru tu uta, tarlobi-lobi adong dope markisar 150 nai naso iubak.

“Inda soni be, upatorus ma mangubak arambir on. Ho antong dot umakmu ma parjolo manaruna, sobaru muse ita dua doma manaru naron. Umakmu mangubak i son. Oban anggimu so adong naron dongan ni umak i son,” ning Si Dalkit.

Taroban Si pahrul do 20 arambir, mangaldung pake bulu. Umak nia tarobanna 15 arambir ijujung. Marangkat ma Si Pahrul dot umak nia manaruna. Umak nia ijolo harana umak nia maniop senter manyulu dalan. Bia mantong ari pe ma golap. Aya nia patorus mangubak arambir. Lampu juguk sada ijugukan ni sopo i, sada nai ilambung nia so tarida arambir ubakon.

Idokon dao, inda pola dao so tolap tu kampung, markisar 15 minit sampe ma alai tu bagas ni Ompung Landong. Ilehen Ompung Landong lampu taromak tu Si Pahrul so torang di kobun arambir an. Dungi ilehenna muse sada senter.

Pabele-bele panait lampu taromak i ia, umak nia kehe ma tu bagas ni alai mangalap si Nisra, boru numur dua itoru si Pahrul. Kalas 2 SMP ma sikola nia. Dung tolap umak nia dot si Nisra, kehe muse ma alai tu kobun arambir an marlampu taromak.

“Oni, si Siti ijia ia, umak,” ning Si Pahrul.

“I bagas ni etek Goima mu ia ibaen,” ning umak nia.

Sangajo antong torang doma parsopoan i ibaen lampu taromak i. manyaksak tu jae tu julu ibaensa. Marsisusun ma alai mangatak arambir i tu aldunganna be. Si Pahrul totop 20 arambir ioban ia. Aya nia tarobanna 30 arambir.

Umak nia antong pupu ma mangubak idongani si Nisra. Bope soni dohot do Si Nisra mangubak, bope antong inda bahat tarubak ia, tai martolong ma goarna.

Sompat do 4 noli alai marulak-ulak namanaru arambir i. Dung opat noli manaru, indape ipatorus kalai manaruna, harana iubak alai jolo arambir naso tarubak sudena, harana on ma pangabisan manaru. Maripas-ipas ma alai mangubak arambir i. Baen na tolu maia goluk, Si Nisra inda be mangubak ia. Ipajuguk ia i sopo i laos mangaligi-ligi ayah umak nia mangubak arambir.

Di borngin na madung pukul 11 lobi, sudung ma sude arambir tarubak. Marsigop ma alai nangkan mulak. Umak nia antong manjujung arambir laos mangompa rantang dot ember nagiot panimbo ni gulaen i. Si Nisra maroban lampu taromak. Si Pahrul dot ayah nia mangaldung arambir. Goluk antong ialdungan i ma ikobet.

Si Pahrul ma ijolo maroban dalan laos patik-patik senterna, sobaru si Nisra ibarisan kadua. Umak nia ibalakang nia, sobaru ayah nia kamindil. Tar jot-jot do alai maradian, harana tarmoteng do si Nisra maroban lampu taromak i. Sampat do opat noli alai maradian sobaru tolap tu bagas ni Ompung Landong.

Dung ietong, bahat ni arambir sudena sabahat 282 arambir. Pandokon ni Ompung Landong, ibagi tolu ma arambir i soni sudena, iolohon si Dalkit antong. Pala ibagi 3 antong sabahat 94 arambir ma sugari bagian ni alak Si Dalkit. Tai ipagonop Ompung Landong ma bagian nalai 100 arambir.

“Sonjia do amang, arambir naon do ioban ko sanga sonjia. Sanga rap ita gadis do so upio sannari pamuge,” ning Ompung Landong. Simpulna igadis ma arambir i.

Dung ipareso Si Abdul Wahab, pamuge di kampung i, tarbagi dua mocom ma arambir Si Dalkit. Sadebana ukuran super, sadebana sam-sam, ima ukuran 2-3. Naidokon antong 2-3 ima 3 arambir sarupo dot 2 arambir ukuran super.

Sabahat 70 arambir masuk ukuran super, dungi sabahat 30 nai muse ukuran sam-sam. Sada arambir ukuran super argana 2.800 rupia. Manjagit epeng ma si Dalkit 196.000 sian na 70 arambir super i. Dungi sian 30 ukuran sam-sam i ijagit ia 56.000 rupia. Bahatna sude 252.000 rupia.

Dung icakukkon ia epeneg i, mulak ma alai sian bagas ni Ompung Landong i. Najop ma roa Si Dalkit harana ma marepeng ia 252.000.

“Oban komu palalu on bo, so adong panggule muyu, harana igadis komu do sude uida arambir bagian muyu…hihihi,” ning Ompung Landong laos mangalehen 10 arambir tu Si Dalkit. ***

Comments

Komentar Anda

Silahkan Anda Beri Komentar