Home / Budaya / Poda Tu Danak Mangaranto

Poda Tu Danak Mangaranto


Na Nisuratkon : Zulkifli Lubis

Marudur do sude angka koum sahutai
Pabuat ko na kehe mangalangka tu pandaramani
Maraburan ilu palua ho langka bohal nasuadai
Lao maho tu gasgas naso binoto rimbanai

Marpupu do hami mandoahon ko sian hutai
Dumenggan ma nian ngolumu mangarantoi
Ngada tarbagi hami diho bohal na mangkalobi
Arani parsabahan dohot suanon ngada pe muli

Paet do palua ho lao mandao sian hami
Angke suada baenon jamahan pe suada tarbagi
Inda markikit hami diho suada dong na tarbagi
Adong pe eme di hopuk tading amben balanjo nami
Painte eme muli tolu opat bulan niari

Tading ma hami sahuta olos markolos markahanggi
Palua danak manjalahi ngolu tu gasgas siamaraani
Ampot tehe aduan dapot ko poda dohot bisuk na jaji
Angke molo di huta on pe ho suada jamahon marbagi

Ulang sai enek rohamu suada bohal tarbagi hami
Ulang lupa maribadat manyombah tuhan nauli basai
Baen Qur’an dohot Hadist sulu ni dalan na mangolui
Burju bisuk ko nian manopot induk somang martondi
Pistar ko nian malo ho mambuat roha pamasukkon diri

Ningot ko tu lomo ni si natobangmu di huta na tadingi
Ulang lupa ho tu huta pardangolan inganan mu sorangi
Gomgom tiop parsudaroan ulang ligi sian sinadongani
Sai marlugut ma nian rasoki mu gabe ho dipandaramani
Manyonang ma roha nami sahuta on mambege kabarmi
 
Suada halangan mu tarbagi maso mulak intean do hami
Ulangi hami mulak tu huta pangubat lungun ni tondi
Tandona ho danak na sorang sian huta balian nauli
 

Comments

Komentar Anda

Silahkan Anda Beri Komentar