Anggo gantengna songon bintang filem Hindustan doma, bope lomlom antong, lomlompe mnisdo songon tobu tutung, inda jabat songon banggar naidurus lomlomna, cocok do lomlom nai tu ganteng nai, songoni juo parbadanna, lele sangolit naidokon ni halakido, inda jabat mokmok songon babi Saraulla, inda muse nyiang songon balanak baledang, keren doma tarida, ningroa targodado artis-rtis sanga bintang filem mangida tampan ni dongan tai, tai herando iba, songon pandokon ni tobang-tobangi, buruk somarpake, songon abit sutera naisimpan martaon-taon dibagasan kopor bosi, songonimada boto, buruk somarpake ning bayo menekma marcarito salaos mangirjop dongan nia nadung lambat lolotma rupana dihaposoan, tai inda dope marripean.

Bope madung jot-jot dilehen simatobangna hata sipaingot anso sugari ijalahanma dongan marripe mamolus adat matobang songon pandokon ni namalo mangkuling, iambungkonma napadan, ibolusma dalan nalidang, iambukonma haposoan ibolusma adat matobang, tai songon naadong dope painteonna, anta baen boratnado parasaan ni ibana nangkan maninggalkon haposoan, inda binoto be, ning bayo menek musema manguduti jamitai.

Anggo sian umurni ibana mangolu diginjang ni tano ni Tuhanon madung pantasma sugari ibana mnjalai rongkapna anso adong dongan sarongit saparkancitan arana bahatdo boru tulangna di balianni huta, pala nasoadong nacocok diroa borutulang ijalahan nabage tu Tapanuli Utara boru situmeang sanga boru Sigalinging atope boru Sitepu tu tanah Karo, naborutulang ni ibanamei arana parmarga Nasution dodabo dongan taon, ning bayo menek musema tarsongon namangalapalapi sotik.

Idokon namabiar didadaboru, betengdo binege kecekna, nabahatdo caritona donganna margaul, muloi sian Sirangkap tu Sinunukan, sian Pakantan lalu tu Batumundom, nabahatdo dongan-donganna bope ibarat ni arambir namersek, tai buruk somarpake, heran iba diiba inda binoto iba niba sanga nagiot mongua giot niba, manombo idokon doma diiba madung sayurma arambir ningiba mandokon iba, ning bayo menek marsitutu ilala ia mangontak pantar nabage jabat.
Sidung doboto kaji ning bayo menek, pala marsuo dohot dongan-dongan saaposoan, deba antong madung dua tolu pinomparna, sapala adong mei daganaki namandokon uwak, adongmandokon nenek, adong muse namandokon amangboru, tuparsianyangan doma ibaen, nenek poco-poco liku-liku laki-laki yang tak laku-laku karena luka-luka ningiba, songonipe idokon mekel iasongoni, inda manyogar abong ni tangan nia pabege-begena, pala buruk so marpake sarupo mei dohot namayuuuuuuuup tompiani tile.

Tibu adong naikojarkon, lambat adong naipainte, songonido dabo dihita namangoluon, anggo 34 taon dope ningmu umur ni dongan tai nabiaso dopei, mungkin dei madung adong naisolong ni matana dompak sikola esempei dope, madung marjanji angkon sobardo paintena tammat jolo essada di perguruan tinggi, napainteon mantongani anggo madung cocok padan parjanjian, angke lagu ni halak najolope pala madung cocok dibagasan roa, tuginjang usigei, siborang laut ulayari piga taon naipe upainte dei, padiar manjadi tape asal hita salumpat saidege, ningia muse dei, ulang ambang bayo menek godok-godok nakotor ni kudoi, ning bayo natampani mangalus, mursotahan ilala ia ona jojal sajo ibaen bayo menek, bingkas mada ilalaia ibarat ni sinapang.(MO/MP/saadlubis/hol).

Comments

Komentar Anda