Budaya

Ikurung Mantong Manuk Tai Inda Ilehen Tuduonna

Songonima boto natarjadi ikurung manuk tai inda ilehen tuduonna mangamburi boto sada-sada, romuse mantong boto namangoban tudukon, ripur sude manuki, hasidunganna lam-lam dai nisirai, iambangia leng manuk nia hapengani madung manuk nidongan , songon manuk naburnungon doma boto tondo-tondo markareput barimbing nai, ning amangtuai mantong, taldus doma tali nisarusur nia patunda tagina namarkombur dilopo Jarindangi.
Pangalaman nalewati doba, arana dabo adong pautanta hata-hata dupang-dupang, hata-hata pambayar utang, songonido naiboto nia, kecekdo ipabahat, janji-janji, pala monang ita lanjutkon pambangunanan, palanga monang ibarat ni parau batang pisang, suk-suk mei tu asakan, ning amangtuai musema manguduti hata-hata niai.
Angke indahan ni supingdo ilehen tudongan-dongan, taonkonma bungkukmu ning halak boto balosna, angke, pala namaradat majolo angkonna adongdo burangir isurduon anak boru, anggo tangan hampado tatap langit, inda lakui anggo zaman sannarion, ning amangtuai musema mamancing-mancing anso bangkit ilala dongan-dongan namarjugukan di lopoi.
Tangkasdo antong ita ida anggo dongan-dongan marpupu mancakuon, marlambar-lambar doma tukaranan narara ijagit dongan, anggo pautan niba umna kecek badongkang balanjo kurang do, marpupu mangadongkon pertemuan ontangi dongan, abis idokon pautani maksud dohot tujuan nia umna marsijalangan maia, mulak male marngauk-ngaukdoma boltok siubeon, songonima antong pasangna, adongdo dabo nian obar sitiopon, pala monang angkan naroma anak boruna mangoban silua, palanga monangba nalam-lamdo dai ni bolgang bulung gadung, ngasongonido ipar ning amangtuai adop Japarira.
Marlain-laindo antong tarimohonta angke inda sarupo dabo rasokii, anggo pautan nami nalomokan doboto, iboto ia ei pala pertemuan natinggalma usaho, pala dung ipasampe ibana maksud dohot tujuan nailehennama rasoki sangkarambar sanga dua lambar panabusi silua gorarna, anggo nakecek badongkang sajo inda narai dongan, idokon dongan dei pautan natilako, ning Japarira antong mangalus.
Songonima naitaonkoni, idokon pautani ioban dongan marrami-rami manangion pidato namarapi-api, arana narodo artis ibukota ningna pala dung laos mulak, ongkos ni motorpe martongkari jolo so dapot, ikrung-kurung mantong manuk tai inda ilehen tudukonna ning amangtuai musema mur marsitutu komburnia, namutuk-utuk sajoma tot nia songon otuk aek, mudap-kudap matania adop samping.
Jado antong amang boru topek do ilala amangboru tu rusuki arana songon namangaroa-roai amu uida ampot nasanasib do hita ipohom-pohomkon kamu songoni tai namanyiak nyiakdo ate-ate muyu, ulang ipohom-pohomkon arana nangkan namanjadi panyakitdo ujungna, palaro panyakit nasusahdo boto, inda natola marutang marsuntik tu mantarian sannari ning amangtuai muse mantong adop lobei. Sangajo ibape martarimodo tu roaniba naidokon muyui boto, pala dung monangdo anso martarimokasi pautan niba, ampot tele ning roa niba mantong idokonma tu dongan-dongan anso ipamonang majolo pautan nibai, adongdo burangirna ningdongando mangalus, anggo naso adong burangirna tatap langit ningiadoboto, anggo iba songon baliung natarisangdoma, anggo zaman sannarion, harani parsuadaanido mambaenna, inda nalaku pintar mangecek, tarsongon pandokon muyui ibaratni manuk angkon naipatudukdo, anggo inda ilehen tudukonna marlariando, ita idado antong buktina tile ning lobei antong alusna.***

Comments

Komentar Anda