Manjalaki Flim India
- account_circle Dahlan Batubara (Redaksi)
- calendar_month Senin, 2 Nov 2015
- print Cetak
Nanisuratkon : Edi Saputra
“Ketale mardalan-dalan tu pasar,” ning si Bejik tu si Besteng. “Sakalian maligi-ligi kaset CD daripada suntuk ita ison bo,” ningia. Ke mada alai langsung tu pasar.
Dung sampe tu pasar, ke ma alai tu parjagal kaset VCD i.
Parjagal : Biado…? Maligi kaset aha lana?
Bejik : Kaset India
Parjagal : Aha judu na lana?
Bejik : Judul na “Kunam In Et”
Ro mantong si Besteng dot muse ia manjalakina ntong.
Besteng : Aha lana judul na kawan?
Bejik : Kunam In Et
Aha dope ntong si Besteng pe dot musema ia manjalaki na. Adong ma get hampir satonga jom na manjalaki kaset Kunam In Et on inda na pasuo-suo dopena.
Parjagal : Inda na adong boto, ma ibungkar sudena
Bejik : Jadima uda da, inda tarkauai be
Parjagal : Olo, bope lek ujalak-jalaki andigan ko ro mulak? Ampot dapot au ancogot!
Bejik : Ancogot pe jadi tile, ro dope au ancogot ba.
Parjagal : O… jadima! Ujalaki pe!
Bejik : Kema mi songoni da
Parjagal : Jadima
Pas mantong itonga pardalanan matukikkik martata-tata si Bejik, hihihihih…. Heran mada si Besteng da.
Besteng : Aso mantata ho? Ompot-ompot mangua lana?
Bejik : Sarupo ma homu dua dot parjagal kaset VCD i, rap lawak-lawak
Besteng : Aso…?
Bejik : Pa balik ma judul ni kaset na udokoni Kunam In Et.
Besteng : Kunam In Et berarti Te Ni Manuk
Bejik :ha…ha…ha
Besteng : Si kuraddal do ho wida, loja doma iba manjalaki-jalaki na…. hihihi….hihi.. anggo ho da kawan.***
- Penulis: Dahlan Batubara (Redaksi)
