MARSIDAO-DAO (episode 13)

Marsidao dao cover

Novel Mandailing

Nanisuratkon : Dahlan Batubara

I Huta Donok, ima na madung pukul 9 manyogot, Si Siti langka tingon bagas. Igoruksa pintu ni bagas i dohot labi-labi namenek, anak ni labi-labi nai ipajopkonsa i toru ni batu na adong ilambung pat ni tangga bagas i. Madung mamboto do daganak ni ia ima Si Poso boti angkangna Si Pikek ganan pamajopan ni anak ni labi-labi muda muli naron kotu Luhur tingon sikola. Dodasna, dung muli sikola, mangan dope Si Pikek i bagas. Dung mangan, nangkan kehe ma ia tu saba parorot anggi ni ia i sopo saba an so ulang pual-pail inang ni ia tingon tonga lupak i muda ngot anggi ni ia i anggunan i. Ngada lolot Si Pikek parorot angina, harana tar pukul 3 nangkan muli muse do ima nangkan kehe tu sikola maktab. Anggo Si Poso do naso dapot do latana, angke maor dope sinaloanna mar jajo i saba-saba an sanga pe markangar i aek godang an dohot dongan-dongan sapangkekna.

Landit ni gadu-gadu saba lumobi do santakna, harana parudan dompak masona. Gadu-gadu saba do dalan ni halak tu saba an, ima na nibolus Si Siti nalangka na kehe tu saba. Erer-erer soni alalao ni ia so ulang tarsulandit targompang boti singgalak sang ape unjar, ulang jabat marmara  daganak namenek na niompa ni ia, boti aronduk nasandang ulang jabat madabu.

Dung tolap tu sopo saba i, ipatibalsa aronduk sareto mangarkari kobetan ni parompa pangompa daganakna. Dung juguk markusande i susui ni sopo i, italluskonsa sada kotuk ni baju ni ia nangkan pamemek daganakna. Pala dung tarpodom, nangkan ipagulungsa ma daganak namenek i ima ianggunan loba na tingon parompa na ikobetkon tu poren siamun dohot poren siambirang ni sopo i.

Anggunan loba do somalna anggunan parpodoman ni daganak namenek i sopo saba so ulang tolapsa mela tingon bagasan ni anggunan i pala tarsunggul na tarpodom i. Angke ngada adong parorotsa dompak i tonga saba i inangna. Ima pala tarsunggul daganak i nangkan tangis ma gogo-gogo. Dungi tangis ni daganak i tarbege tu inangna so ro tingon tonga saba i tu sopo i mambue-buena.

Bona-bona ni eme madung mangarata ampar i tonga saba na sabunbun i. Maso on dompak marbabo boti mamatangi dope halak parsaba, ima namangela duhut-duhut tingon tonga lupak anso salang boti ulang duhutan. Somalna, ijulukkon ma duhut i tu bagasan ni bustak i so bucuk. Pala ngada bagas bustak ni lupak, ipaampar do duhut i tu ginjang ni batangi i. Dung tarbabo lupak i, ipalalu ma mamatangi batangi ni lupak i, ima namambalik batangi so tanom duhut i i tu toru batangi.

Madung adong tar 2 jom lolotna Si Siti munduk-unduk i tonga saba i. Madung tar 3 pantak do tarbabo ia sian saba na sabunbun i, ima nanikarejohonsa tingon dua ari nasolpu. Dodasna ma sidung do tar 4 pantak pala naipangkal tingon dua ari nasolpu, tai udan na pupu ro boti na pupu siang do mambaen babohon ngada bahat sidung.

Kibungsa do marbabo mamatangisa, harana alaklai ni ia ima Si Imran ngada marlapang ima na kehe mangomo manjalai balanjo tu bagasna. Boti muse namangguris tu kobun apea. Mari-ari pala ngada mandaek gota, nangkan mambuot soban tasir do alaklai ni ia  ima so potang do mulak tingon kobun gurison.

Soni ma alai na marripe, adaboruna tu saba, alaklaina manjalai pangomoan pala gurison ngada targuris. Jaru pe songoni, pala dompak inda kehe mangomo, les dohot do Si Imran tu saba, bope dompak manajak, mangalamlam boti paiaskon sanga pe marbabo mamatangi. Tai, pala dompak manyuan boti manyabi mardege, ngada tarbaen Si Imran muse kehe mangomo boti mangguris, harana angkon dohot do ia namanyuan sanga pe na manyabi mardege i.

I Huta Huraba, madung adong do tolu parlapungan na ipiar ni alak Si Imran. Induri nanibaen ni alai mamiari lapung i nanisolang do tu parlopoi, angke ngada maroban induri alai tu Huta Huraba, goni maia tar 4 kalambar.

Tingon na tolu parlapungan i, adongma tarpalagut alai tar 2 belek eme na pusil-pusil. Ngada sude parlapungan ni saba na les adong tading emena na pusil-pusil, harana bahat do parlapungan ni halak parsaba i na madung ijama halak huta i, ima halak paritik, ima namambaen pahanon ni itik nanipinahanna. Sadebana parsabai do mamiarina, ima parsaba nanidokon durung lamot. Inda nibaen kikit sanga pe codikna, tai pambaen ni hangoluan na dangol partunda saba naotik.

Dung do isabi eme i, nangkan ipalagut ma i tonga ni saba i, ima goarna bunbun. Ancogotna nangkan mardege ma pala saro na jolo. Tai, saro sannari mangarobot doma goarna sanga pe mangarontok ningna, ima bosi namoron-oron na ioron ni masin diesel. Eme na pusil-pusil mardabuan tu toru nai; durame nai ramban tar dao tingon masin pangarobot I; lapung nai ramban donok i pudi nai, ima nanidok parlapungan. Ngada sude lapung, adong do deba eme na pusil, pala ipiaran dohot induri iombus sialogo ma lapung i, napusil madabu tu toru, ima eme nanipalagut halak si Imran.

Onom belek sidungna tarpalagut alai i potang ni ari i, nanigadis tu pamuge eme i huta i. Sabahat 265.000 rupia epeng panggidasanna, ima nanibola 5 dung ipasimbah tambang ni alai lima nangkan na muli tu Huta Donok. (marsambung)