MARSIDAO-DAO (episode 14)

Marsidao dao cover

Novel Mandailing

Nanisuratkon : Dahlan Batubara

Songonima alai na mar sidao-dao tu huta balian, golap-golap bontar mangalao, luas Magorib muse doma mulina. Madung sapoken apea gurison ngada niguris, mambaen sapa-sapa ni roa Jatorkis nampuna kabun. Nanisuruna ma Si Masnia dadaboru ni ia manyunggul Si Siti.

Ima na dompak muli tingon tapian an, nanipaudur Si Masnia ma Si Siti. “Ubege-bege ngada namangguris, anakki na sapoken on, Maen. Namaua do ia baya, na iras do ia sanga songonjia,”  ning Si Masnia.

“Imada, Bou, nakehe marsidao-dao do anak ni Bou dohot dongan-donganna ima na tu Huraba. Angke baya manombo dua ari maia na deges ari,” ning Si Siti.

“Bo baya, tama mantongan i, Maen. Manyabi ma antong tarbege i huta-huta na adong i Siabu”.

“Imada, Bou. Songonjia mantong, angke parudan boti na rap dompak mardangol sudena”.

“Olo baya, rap markairasan sude doma da ita pangidohon, Maen”.

“Olo da, Bou. Satontang naso mangguris anak ni Bou, nangkon pala taili Amangboru, harana ro do anak ni Bou tu bagas ni Bou poken on,” ning Si Siti dompak so manyihil alai i panyirpangan i.

“Ala baya, Maen. Udokon pe tu Amangboru mu,” ning Si Masnia.

***

Ari Akad ngada sikola daganak, ima so dohot Si Siti boti Si Poso tu saba mangiutkon inang ni alai, oban durungna dohot udon songoni ualina.

Ngada adong patureon ni alai na dua i saba an, harana inang ni alai kibung do na pature saba i. Anggo alai na dua na tarsongon marlolo do boti mandurung baen asompodeon salaos parorot anggina, so lumapang inang ni alai napature saba i, nagada be tongkin-tongkin tu sopo pala tangis daganak i anggunan.

I ari sadari i namanaktak duru maia inang ni alai, harana madung sidung do babohon boti namamatangi di ari na solpu.

Dung tarpodom anggina i anggunan i, nakehe ma alai nadua mandurung tu bondar saba i. Ngada bahat gulaen ibaen dodasna alak manarapo i huta i. Jaru pe songoni les adong do napupu tardurung burirak, piri-piri, aporas dohot anaken.

Iatagianna namandurung, ro joung-joung ni inangna namandokon natarsunggul anggi ni alai.

“Olo, umak, tu sopo i ma au,” ning Si Pikek.

“Ho ma soni tu sopo an, so upalalu mandurung, dung modom ro ho mulak,” ning Si Poso.

“Olo,” ning ia sareto marlojong-lojong manopotkon sopo i. Ianggunsa anggunan i salaos marolo-olo papodom anggina. Dung tarpodom mulakan anggi ni ia, na kehe ma mulakan ia marlojong manopotkon Si Poso.

Tarmiduk do gulaen nanidurung i, tuk sakali mangan ji alai. Marayak kotu Luhur ibituai inang ni alai gulaen i, anggo burincak nai hum nanibasu maia, angke ngada tarbituai. Bulung gadung dohot torung tunjuk madung do nangkin ilaoskon inang ni alai nanicalong tingon gadu saba i ambaen bolgangon dongan ni asompode.

I udon i do mambolgang boti mardahan. Dung ibangkit do bolgang so mardahan. Mangasompode ima i uali. Taru uskus doma tu igung muap ni asompode i, mambaen boltok male i sopo saba. Tai ngada pe na tola mangan dompak so sidung alai sumbayang Luhur.

Ima tagina mangan i sopo saba, bus-bus ni sialogo na pupu marombus, indahan na milas marpinggan bulung pisang boti siak ni asompode, mur ona ibaen bolgang bulung gadung dohot torung na baru icalong. Na pupu do Si Poso mangalap odokna dohot busayan maridi i salaos mangaum indahan tu papanganna. (marsambung)