MARSIDAO-DAO (episode 16)

Marsidao dao grafis

Novel Mandailing

Nanisuratkon : Dahlan Batubara

I kotu Isya, i ginjang sajadah tarlolot Si Siti marsujud kamindil. Dung salose sumbayang, lao ia tu dapur na giot pature mangan ni alai sabagas. Si Poso dohot Si Pikeok tonga mangapil parsiajaran i pantar tonga. Ngada sajia onok muli amang ni alai tingon musojid. Isangkotkonsa kupiana i labang na adong i ding-ding bagas i sareto mangontang alai mangan tu dapur.

Nagada sajia obar ni Si Siti na dompak mangan i. Ontat mangecek satontang duru ni saba na madung salang tarpature dohot satontang naso kehe be alaklai nia i mangomo markuta luar ancogot.

“Marsoban doma au ancogot tu gurison an,” ning Si Imran salaos mangaumkon indahanna.

“Maradian majolo dabo, aduan doma tu kobun. Loja dei dabo na markuta luar,” ning Si Siti.

“Tai, aduan adong orja, aso lupa,” ning Si Imran.

“Olo tile, bo baya, lupa au baya,” ning Si Siti salaos mikim martata mambaen pipi lusung i urum nia tangkas tarida. Urum na bontar rara mar losung pipi, ima na mambaen bahat poso-poso mangopkop Si Siti dompak bujing nasolpu. Bahat do poso-poso mardangol roa dung marbagas ia dohot Si Imran. Harana Si Imran maia na tomtom tu roana.

Dung inang-inang pe sannari, les deges dope parrupo nia. Nalagak boti nabisuk partompana. Bahat do bayo-bayo na taili pala dompak mamolus Si Siti i banjar i sanga pe nalao tu saba boti tu poken.

Gule robung marpangaroca aruting sale nalumobi tabo ilala si Pikek dohot Si Poso mambaen mangan ni alai nadua tar gomos-gomos.

Dung salose mangan, ngada kehe be Si Poso aor dohot donganna tu alaman, ipalalusa do mangapil dohot angkang nia. Amang ni alai madung kehe ma tu lopo; inang ni alai margulung-gulung papodom Si Rahim.

Udan simbur-simbur binege mulak tu seng ni bagas, partando parudan ngada pe mantak. Tar pukul 10 ma Si Imran muli tingon lopo. Si Poso dohot Si Pikek madung modom i pantar bolak i. Igoruksa pintu bagas salaos mangalao tu dapur manopotkon dadaboru nia na madung sidung manyale gulaen, ima gulaen na nioban Si Imran potang ni ari i tingon Huraba.

Tarbege Si Rahim tarsunggul i bilik. “Iompa abang ma jolo ia tu bilik, dompak marmiak gulaen tanganku,” ning Si Siti.

Dung sidung mambasu tangan, ro ma ia tu bilik. Iambitsa daganak nia tingon ampuan ni alaklai nia salaos juguk i ginjang podoman i, sareto manalluskon dua kotuk ni baju nia nangkan pamemek daganakna.

“Nangkin i saba, marsapa Si Poso satontang ompung nia. Dongan nia adong opungna, ia ngadong ompung nia ningia,” ning Si Siti. Tarsonggot Si Imran salaos juguk sian gulungan nia.

“Oni, maua nimu tu alai,” ningia.

“Udokon, adong do ompung ni alai i nadao, tai indape tuk epeng tambang tu huta ni ompung ni alai,” ningia.

“Sonjia doma tile”.

“Imada, au pe nga uboto be sanga sonjia”.

“Bo, anggo na dung iboto alai, angkon na ita oban dei alai tu sadun”.

“Sonjia ita marobanna, angkon na dohot do ita i botole,” ning Si Siti salaos munduk, songon na giot ro ilala ia ilu ni mata nia, ulang jabat tarida alaklai nia.

Markusandar Si Imran tu ding-ding podoman i salaos manaili tu pagu ni bagas, mangaramang-ramangi dalan pasuohon daganak nia dohot ompungna pala ngada tarilakkon pangidoan ni daganak aduan. “Antong uecekkon majolo tu kahanggi, dalan sanga songonjia do nangkan boluson,” ning roa nia salaos ipadonok ia tu dadaboru na.

“Songonon ma roangku, uecekkon ma jolo dohot kahanggi sanga songonjia…eh namaua do ho,” ningia salaos maniop abara ni dadaboru nia na les munduk i. Taraso ilala ia utur ni abara ni dadaboru nia tu palakpak ni tangan nia.

“Natangis do ho langa, namalungun muse ma ho aropku tu nantulang,” ningia sareto mangabin muko ni dadaboru nia. Matunguk-nguk Si Siti salaos mandalpakkon tangan tu babana so ulang tarbege tangis nia.

“Sobar ma ho, anggi. InsyaAllah nangkan adong do aduan ni ari parsuoan dohot nantulang bope tulang,” ning Si Imran salaos ialuksa dadaboru nia mangalomokna so merer tingon tangisna.

“Anta na madung jumolo ma baya umak ki, ngada unjung marsuo be,” ning si Siti mur magogo utur ni pamatangna namatunguk-nguk i.

“Ulang dokon songoni, ulang sihil-sihil pangaroaimu. Iras dope nantulang i Bilah, inda pe jumolo. Pasada ma roamu, anggi,” ningia.

“Bolasan taon baya ngada tarida. Nalungunan ma aropku ilala inanta, songon lungun ku naso tartaonkon. Ngada baya iboto ia sanga tujia manjalai au, na monjap i luat nadao,” ningia mur matunguk-nguk. (marsambung)