Budaya

MARSIDAO-DAO (episode 31)

Marsidao dao grafis
Marsidao dao grafis

Novel Mandailing

Nanisuratkon : Dahlan Batubara

I huta Huraba, ngada adong na paomohon sabana. Angke tola dokonon, madung sidung suanan ni parsaba i huta i. Juguk turnguk Si Siti dohot donganna na tolu alak i i sopo banjar na nilambung masojid i.

“Tu huta Lumban Dolok ma batas ita kehe marsapa antap adong pangomoan i sodun. Sanga dapot mangomo mangalata sanga manajak parlasiakan,” ning Si Saleha.

“Soni pe jadi,” ning Si Marmah.

Sonima na marsidao-dao, manombo ngada adong pangomoan i huta balian. Ima so manombo adong do inang-inang na muli manyogot tingon huta balian pala dompak ngada dapot pangomoan i huta na dao. Tambang ni motor totop do aruar.

Mangalao alai opat mardalan pat tu huta Lumban Dolok, harana ngada dao huta Lumban Dolok tingon huta Huraba i. Paombar-ombar do tola dokonan huta nadua i.

Bope saba i huta Lumban Dolok madung sidung suanan songon na i huta Huraba, tai ngada sude saba sarop marsaba i huta Lumban Dolok i. Harana, sadebana do marsaba, sadeba nai marlasiak boti markacang marancimun. Ngada tuk aek ni bondar tu sude saba, ima so marbariba do uhum na na marsaba. Saba sian bariba jae marsaba, saba sian bariba julu marlasiak marancimun. Sidung i, sian bariba julu muse doma marsaba, sian bariba jae muse marlasiak marancimun. Ima so tarbonggal do lasiak na tingon Lumban Dolok tu jia-jia, angke ngada unjung mantak alak marlasiak.

I huta Donok, sidung igoruk Si Poso pintu bagas i, mangalao ma ia ipaudur Si Pikek tingon pudi ompa anggina iambitan marparompa. Dompak so tu sikola, tu bagas ni ompung Rosma dope alai maroban anggina nangkan parorotsa. Tolap tu bagas ni ompung Rosma, na tutup do pintu i.

“Assalamu’alaikum, Ompung,” ning Si Poso pio-pio tingon tangga bagas i. Ngada adong na mangalus. Itulaksa pintu i, ngada margoruk. Pio-pio ia mulak sareto manindo tu bagasan. Ipiona sanoli nai, terbege alus ni ompung Rosma tingon bilik sareto mandokon so ro alai tu bilik i.

“Oi..baya, Anggi. Na marun do ampung,” ning ompung Rosma les gale ipodoman i dung tolap alai tu bilik.

“Marun malaria do, Ompung,” ning Si Pikek.

“Olo, Anggi. Madung marsuntik mangan pel ma ompung. Sonjia doma roa muyu Anggi, inda na tolap ampung aropku marorot si Rahim. Na lupa do ompung baya manyuru alak mandokonna tu umak muyu namarun ompung,” ningna.

“Olo, Ompung. Ma mangan ma, Ompung,” ning Si Pikek.

“Madung anggi, ioban si Linda nangkin indahan. Ipe na paet do ulala manganna, Anggi,” ning ompung Rosma.

“Olo baya, Ompung. Anggo soni, kehe ma ami, Ompung. Pala porlu, ro au mangaligi panginuman ni Ompung naron dung muli au sikola,” ning Si Pikek.

“Inda pola, Anggi. Bisa ompung do anggo pamilas aek sajo,” ning ompung Rosma.

“Olo, Ompung. Ke mami,” ning Si Pikek.

“Olo, Anggi. Pala dung murak arun ni ompung, idokon ompung tile, so oban anggimu mulak tu son da, Anggi,” ning ompung Rosma.

“Olo, Ompung,” ning Si Pikek.

Aruar tingon bagas i, juguk alai nadua i sopo na i jolo bagas ompung Rosma i. Mar marsak ni roa  sanga ise doma parorot anggina.

“Sonjia doma, Abang,” ning Si Pikek.

“Imada. Au pe nga uboto be,” ning Si Poso.

“Uoban maia dabo soni tu sikola an. Tujia dope antong ita baen ia. Sikola nagiot masuk mon bo,” ning Si Pikek.

Borat do ilala Si Poso mangolohonna. Sonjia mantong Si Pikek parorotsa i bagasan ni sikola i, mari-ari pala pupu tangis anggina mambaen marsak mei tu roa nia dohot Si Pikek. Ngada be damos ilalasa namarsiajar i.

“Pala nga soni, ita cubo mangido tolong tu etek Manna parorot anggi i parjagalan nia i,” ning Si Pikek.

“Pala nga soni. Pala inda ra etek Manna, bope batas au libur sikola sadarion, ancogot muse ho muse na libur. Margonti ita ganop ari i bagas parorot ia. Ning rongku soni doma i,” ning Si Poso.

“Inda ona ukum ita langa i pala martempo-tempo sikola,” ning Si Pikek.

“Bo, udokon tu guru nami i, dungi udokon muse tu guru muyu i,” ning Si Poso.

“Soni pe jadi. Tai sapai jolo sanga adong aek inumon tu ompung Rosma, so adong inumon Si Rahim i sikola an ,” ning Si Pikek.

Mangalao si Poso mulak tu bagas ni ompung Rosma. Inda sajia onok aruar ia maroban aek i ganan ni aqua.

Udur alai i banjar i nalangka tu sikola i. Si Pikek les ompa anggina, si Poso manjing-jing tas ni Si Pikek dohot ganan ni aek inumon i.

Dung tolap alai tu alaman ni sikola i, taru na tu alai doma talionon ni daganak-daganak sikola. Adong deba na mikim-mikim do; adong muse na mangaligi maribo. Angke na gaduk do ilala alai mangaligi Si Pikek ompa anggina na tu sikola. Ima so irongomi alai Si Pikek dohot Si Poso.

I rongom ni daganak-daganak sikola tu alai, bahat ma namarsapa aso mangompa daganak Si Pikek tu sikola i.

“Kehe umak ku mangomo marsidao-dao, ngadong parorot anggingku. Ima so uoban ia tu sikola,” ning Si Pikek. Mata nia tarida maraek marilu songon na giot tangis.

“Ulang ko tangsi dabo, dongan,” ning Si Taing mangapus gurung-gurung Si Pikek. (marsambung)

Comments

Komentar Anda

Silahkan Anda Beri Komentar

Situs ini menggunakan Akismet untuk mengurangi spam. Pelajari bagaimana data komentar Anda diproses.