Budaya

MARSIDAO-DAO (episode 34)

Novel Mandailing
Nanisuratkon : Dahlan Batubara

Marsidao dao grafis
Marsidao dao grafis

Aruar sikola i, tu parjagalan i ma Si Pikek mangalao. Tarbegesa anggina madung tangis ianggunan i.

“Nabaru ngot dei ia. Tarbisuk do uida anggimu, Inang. Inda jot-jot tangis” ning parjagal i.

“Olo, etek. Tarimokasi ma tu etek,” ning Si Siti sareto mangela anggina tingon anggunan i.

Si Poso pe madung ro tu parjagalan i. Iarkarisa pamudun ni anggunan i, dungi iolitkonsa tu abara Si Pikek so tarompasa anggina. Sidung mangobarkon mauliate tu parjagal i, mangalao alai muli. Si Poso mangoban ganan ni boal ni anggina, Si Pikek mangompa.

Laing bahat do dongan-donganna mangudurkon Si Pikek namangompa anggina. Angke maribo ni roa do alai mangaligi dongan ni alai i mangompa anggina tu sikolana.

Dung tar dao tingon sikola i, tarbege joung namanjoungkon “umakna…!” tingon pudi. Ampe joung-joung ni daganak-daganak parkalas onom ma namangarisak Si Pikek na ompa-ompa i. Tardokon do adong tolu alak daganak-daganak par kalas onom i na lumobi dogil i sikola i. Angke nadua alak i pompar ni pegawe negeri, na maradong na marpuraga i huta i. Sada nai muse pompar ni pamuge eme boti nampuna masin padi, naso mangarasoi parkancitan ni angoluan nibaen amang inangna na bahat epeng boti na bolak saba dohot kobunna.

“Nangkon porluon,” ning Si Poso tu Si Pikek.

“Olo, Abang,” ning Si Pikek paunduk uluna laos palalu alalaona.

“O Pikek, piga ma anakmu, Pikek…!,” ning daganak-daganak parkalas onom i mulak tingon pudian.

“Ulang porluon. Taripas ma ita lao so tibu ita marsarak dot alai” ning Si Poso.

“Olo, Abang,” ning Si Pikek sareto paipas pangalaona.

Sapetona, madung manyota do kalang ni Si Poso tu natolu halak i. Tai, itaonkonsa do ate-atena na madung manyintak i. Ngada adong dengganna marbada, ngada adong dengganna marosom. Ima nanipodaon amangna, dompak mangolu nasolpu.

Mantak polngit daganak-daganak na dogil i manjoungi alai, nibaen mamolus sada guru. Kotidak, nangkan ipalalu alai dope sugari na mangarisak i. Si Pikek pe madung sada roana, harana mabiar do ibana margusar niroa angkang nia tu par kalas onom i, ulang jabat marbadai ibaensa.

I marayak kotu Isya i, mangalao Siti tu bagas na muli tingon huta Lumban Dolok na marsidao-dao i. Taru namarsionjor doma Si Rahim iampuan ni Si Pikek mangida inangna na madung ro i. Isurduhon Si Pikek anggina tu inangna.

“Bo, ma malungun ko langa, Amang,” ning Si Siti sareto mangaluk Si Rahim tu ambitanna sareto pamemeksa.

“Umak, i sikolaan do ia nangkin ubaen, ianggun i parjagal i” ning Si Pikek.

“Oi baya. Aso, inda tu ompung Rosma langa ipajagohon,” ning inangna natarsonggot.

“Marun ompun Rosma, Umak, ima so nga ami boto sanga tujia anggi ami oban,” ningna.

“Inda maua ning guru muyu i langa, Inang,” ning inangna.

“Inda, Umak,” ningna.

“Oni, jot-jot do ia tangis ianggunan i,” ning inangna.

“Sasakali. Dungi etek parjagali ra manganggun anggi. Tuaek nagodang sanoli maia, ro etek parjagali tu kalas nami mandokon natuaek anggi” ningna.

“Oi baya. Martarimokasi do ho tu etek parjagal i kan, Inang”.

“Olo, Umak. Udokon do tarimokasi”.

“Imada, Inang. Satiop itolong alak iba, angkon totop do idokon tarimokasi. Dungi, aduan ni ari, pala tolap sitolongon, angkon muse do itolong alak i. Ima goarna ita namangoluon marsitologan, margonti do marsitolongan”.

“Olo, Umak”.

“Anggo songoni, naron ma umak kehe tu ompung Rosma an. Dungi laos umak jalaki jolo alak parorot anggimu, so ulang sabat ko dot abangmu maroban anggi muyu tu sikola,” ning inangna. (marsambung)

 

Comments

Komentar Anda

Silahkan Anda Beri Komentar

Situs ini menggunakan Akismet untuk mengurangi spam. Pelajari bagaimana data komentar Anda diproses.