Budaya

MARSIDAO-DAO (episode 37)

Novel Mandailing

Nanisuratkon : Dahlan Batubara

Marsidao dao grafis
Marsidao dao grafis

Sonima goritna namarnyae marsituhuk, ngada tardokon bage aha. Ubat do nalalu, situhuk ngada pe adong tu murakna. Jaru pe songoni, laing pupu do kehe Si Siti mar huta balian mangomo. Angke, sada ibana maia na manjalaki tu bagasna nibaen madung jumolo amang ni daganakna.

Urker-urker do ia i saba ni halak i, i arilas ni ari i, manaonkon situhukna, na mangomo so laing adong epeng panabusi ni panganon ni pomparna, so laing mangan alai sabagas.

Sapoken dung i, na unjar do ia i saba Huta Huraba, na unjar mambatukkon mudar. Nanipiang ni donganna doma tu sopo saba i, iirpas-irpas dohot busayan maridi, ipainum sareto ipagulung i pantar sopo i.

“Ioban ma ho muli tu uta, da dongan,” ning Saleha.

“Nangkon, i sopo on mau soni, rap mulak ita naron,” ning Si Siti.

“Oi baya, gonanan do ho ioban muli aropku, so marubat ko i uta,” ning Si Murni.

“Ison ma au soni painte mu. Ulang jabat iboto daganakku au naunjar, ulang jabat marsak alai,” ningna.

“Oh..soni do. Jadima dongan, margulung-gulung ma ho soni, naron ita rap mulak,” ning Saleha.

Potang ni ari, muli alai opat tu hutana. Laing lambok do pangalao ni Si Siti. Luas Magorib ma tolapna tu bagasna.

Tingon i, ngada be tolapsa mangomo, na juguk doma i bagas, sasanoli manggulungkon ibana i podoman i.

Ni sada ari, idokonsa tu Si Poso mamio kahanggina Si Muklan dohot dadaboruna. Nangkan adong giot dokononna tu parkahanggian ni daganak i.

“Imada, Amangboru bope Inangboru. Inda tolap au be mangomo maso on. Sanga sonjia daganak on, tu Amangboru doma upasahat ning Amangboru,” ning Si Siti dung juguk Si Muklan dohot dadaboruna i bagas i.

“Olo, Maen. Ulang jabat marsak roamu. Anggo daganak i do, na ami jago dei. Inda ami pajiar homu mardangol. Ima gunana kahanggi markoum marsisolkot. Rap marsitiopan marsiboloan. Koumta markahanggi mar ula-ula bahat do i son. Pasada ma rohamu, Maen. Marubat ma jolo husukkon, so sigop murak matorkis,” ning Muklan.

“Olo, Amangboru. Marubat kampung ma ua jolo upaudur, anggo tu ruma sakit les na soni do ulala ngadong parubahan,” ning Si Siti. Sapetona nibaen naso tuk be epengna mamben tu ruma sakit, angke tar 2 ameh nai doma nanipajopisa.

Ngada tama ilalasa manyolang epeng parubat tu koumna, mari-ari sude halak namardangol markoletan do masona nibaben tuor ni apea ngada pe ra magodang. Boti, epeng tu ruma sakit ngada saotik, ise ma natolapsa pasolangkon epeng sai bahat. Tarbonggal do madung bahat halak maranduk tu parjagalan, ima na maranduk dahanon nibaen ngada tuk manombo epeng tingon tuor ni apea.

Sonima namarkahanggi i, naniobarkon Si Muklan do tu kahanggina situhuk inang ni Si Poso, so rap pupu manungkirsa, maroban siobanon so laing manayang ngolu-ngolu ni pinomparna boti tarpanayang sidangolonna manabusi pulungan-pulungan ni ubat kampung songoni muse sijalangon tu na mardatu.

“Aropku, pala tama, uoban ma soni Si Poso paijur arambir ari-arion pala dung muli ia sikola, sonjia do pandapot ni Amangtua,” ning Si Mulhan tu amangtuana Muklan.

“Bo, tama dobai so les adong tamba-tamba ni balanjo ni alai. Pala marsuo obarkon ma jolo tu sia, tai ulang porsir-porsir jabat ia, harana nadanakan dope pamatangna,” ning Muklan. (marsambung)

 

Comments

Komentar Anda

Silahkan Anda Beri Komentar

Situs ini menggunakan Akismet untuk mengurangi spam. Pelajari bagaimana data komentar Anda diproses.