Budaya

MARSIDAO-DAO (episode 38)

Novel Mandailing

Nanisuratkon : Dahlan Batubara

Marsidao dao grafis
Marsidao dao grafis

Muli tingon sikola, na mangan gomos ma Si Poso i bagas. Sidung marsalin pakeanna, idokonsa tu inangna nangkan kehe paijur arambir dohot udana Si Mulhan.

“Bo, andigan langa marsuo ho dohot uda Mulhan mu,” ning inangna sian gulungan i pantar tonga i.

“Tuari, Umak. Iontang uda au paijur arambir ganop ari dung mulak sikola. So adong ningia tamba ni panabusi dahanonta,” ning Si Poso.

Tarsonggot do inangna mambege obar ni pomparna. Maribo ni roa tu Si Poso naniontang ni koumna kehe mangomo, bage menek dope sibukna, naso johomna dope tupangomoan. Tai, ngada malo ia mangkuling mandok ulang tu pomparna i, mari-ari kahanggina do namangontang, ima so ipabulusna ma songoni akehean ni pomparna tu pangomoan i.

“Bo baya, Amang. Anggo songoni ulang manjatai-jatai alak puna i saba-saba an. Ulang ko i toru arambari i pala dompak paijurkon. Dungi martutur do iba pala mamio alak da, Amang,” ning inangna.

“Olo, Umak,” ning Si Poso sareto aruar tingon bagas i. Marlojong do ibana tingon jolo bagas i, marlojong nibaen marjop niroa naniontang ni udana mangomo paijur arambir, so laing adong manjagit epeng, so ilehensa tu inangna mamben panabusi dahanon boti parubat ni inangna.

Tu saba Apas ma Si Poso kehe, harana rumbuk ni tahina dohot Si Mulhan na tuari i, tu saba Apas ma sadarion nangkan itopotkonsa Si Mulhan. Tolap tu saba Apas, ijalahina sanga tontang saba nise do Si Mulhan. Ngada sajia onok, na taridasa ma Si Mulhan i saba ni alak Si Ronda mangusik-usikkon bodatna na madung manaek i odong ni arambir i.

“Udak..!,” ningna manjoung dompak so tolap tu toru ni arambir nanipaijur i.

“Bo, ma ro ho, Amang. Ma mangan kotu ma ho,” ningna.

“Madung, Udak,” ningna.

“Anggo songoni, pajuk ma jolo, loja dope ho namardalan tu saba on i”.

“Olo, Udak,” ning Si Poso sareto ipajuguksa i duhut-duhut i ilambung ni Si Mulhan.

Tardok do Si Mulhan parbodat na bahat paijuronna i huta i. Angke, ngada saru ra manyimbilkon etongan ni arambir nanipaijursa. Ima so marjop ni roa halak parsaba tu sia. Dungi, ngada saru ra ibana manggendan bodat nia pala tarlosok mandabuon arambir tingon ginjang. Ngada songon parbodat nasihil i, taru marciok-ciok do binege bodat i pala ibasbas alai dohot arirang.

Sidung tarpaijur na sada batang i, idokonsa tu Si Poso ipalagutsa arambir i tingon lupak ni saba i tu gadu i.

“Palagaut ma Amang da, so kehe uda tu batang na odunan. Dungi, paasing jita upana. Pala sapulu arambirna, buotma jita dua, jinampunasa salapan,” ningna.

“Olo, Udak. Pala dua bolas sanga sabolas, sajia jita,” ning Si Poso.

“Pala lima do, bout ma sada. Pala onom sanga pitu, sada mai jita. Pala salapan, dua jita. Pala sabolas les dua jita. Pala dua bolas sanga tolu bolas les dua jita. Pala opat bolas sanga lima bolas, tolu jita,” ning Si Mulhan.

“Pala dua pulu,” ning Si Poso marsapa muse.

“Payah dei dua pulu samayang, dodasna paling bahat salapan bolas. Pala sai buot ma jita opat,” ning Si Mulhan.

Dung do tarpaijur sude bona ni arambir ni alak Si Ronda i, na maradian ma alai. Harana angkon iparadiankon do bodat i, so laing gogo sibukna paijur arambir boti ilehen panganonna, ima arambir poso.

“Adong nangkin arambir poso dua i gadu na ilambung ammadiaek an, alap jolo Amang so ita lehen panganon  ni bodi on,” ning Si Mulhan.

“Aso idokon bodi i, Udak,” ning Si Poso.

“Dua dabo goar na i. sada bodat, sada nai bodi. Pala bodi saro alusna ma”.

“Abis bodat i dei dua arambir poso langa, Udak”.

“Inda ba, sada sajo dei, upabuotkon dua so ji ho sada”.

“Malo do langa bodat i mambuot arambir poso i, Udak”.

“Olo, iboto ia dei pala idokon hayooo ambil yang muda, ipili ia mei naposo, angke mabiaso. Tai, manombo langsung dei kehe ia tu mayangan na poso i sobaru iligi-ligi ia iba. I tando madung male mei ia. Ambillah ningiba, ibuot ia mei,” ning Si Mulhan.

“Olo, Udak,” ning Si Poso salaos mangalao mangalap arambir poso i.

Dung tolap ibana maroban arambir poso i, ipatibalsa tu lambung si Mulhan sareto mamata-matai bodat i na ikobet tu bona ni balimbing i napupu muse manalion tu sia.

“Italionna ho, Amang,” ning Si Mulhan.

“Imada, Udak. Aso pupu italionna au i,” ning Si Poso.

“Bo, baen naioban mu dei arambir poso i, ima so italionna ho. Mandokonna ma ia i so iubak ko baru lehen tu sia, harana inda malo ia saro ni jolma,” ning Si Mulhan.  (marsambung)

 

Comments

Komentar Anda

Silahkan Anda Beri Komentar

Situs ini menggunakan Akismet untuk mengurangi spam. Pelajari bagaimana data komentar Anda diproses.