Novel Mandailing

Nanisuratkon : Dahlan Batubara

Luas mangan manyogot, namangalao ma Hamzah dohot Isrot maroban daganak i tu Bilah Hulu nangkan manopotkon ompungna. Marmotor do alai tu sadun. Ngada jabat dao, ngada sadao tu Rantau Prapat.

“Waktu paman ke sana tiga tahun lalu, nenekmu masih sehat,” ning Hamzah tu Si Poso i topi dalan i painte motor.

“Nenek kami sudah tua ya, Udak,” ning Si Pikek.

“Sudah, Nak. Kira-kira umur 60 tahun mungkin sekarang,” ningna. “Waktu masih tinggal di sini, nenekmu sering datang ke rumah paman cari kabar mana tau ada kabar dari ayah kalian atau ada kiriman surat,” ningna muse.

Ngada sajia onok, ro motor tambang i. Dung iambatsa, manaek alai tu motor i nangkan maroban alai tu Bilah Hulu.

I Mandailing, i Huta Donok, mambatukkon mudar mulak Si Siti i gulunganna i pantar tonga ni bagas i. Pomparna Si Rahim pupu tangis ilambung ni inangna. Ngada tarpaturesa dope pomparna na tangis i, angke na suhung-suhung do uluna tu kadak i na mambatukkon mudar i.

Dung markerer batukna, mangalao ibana marsirais i dingding ni bagas i nangkan kehe tu dapur giot manauk inumon. Marnguasi do jabat ibaen urker ni batuk i.

Dung tar togos ilalasa pamatangna, iampuna Si Rahim so mantak na tangis i. Laing juguk ampu do ibana markusandar darse tu dingding ni bagas i. Italionsa tu tataring i. Udon dohot panci laing tibal dope i lambung ni dalian i, naso ibasu dope tingon borngin i. Na giot mardahan dope ibana, tai pamatangna laing loja darse dope ilalasa.

Ngada pe ro dadaboru ni kahanggina manungkirsa, nibaen na manyogot dope ari. Ra do tar pukul 9 tu na pukul 10 alai ro manungkir Si Siti sareto pature aha na giot patureon i bagas i. Pala marayak kotu Asar buse doma ro, oni luas Isa pala borngin. Dadaboru ni kahanggina doma pature Si Siti saonok i Bilah daganakna.

Anggo mardahan manggule tolapsa dope, angke ngada jabat onok-onok jong-jong i jolo tataring. Angkon na manggaor gule dohot patuba soban ni dalian ma so jong-jong, sanga mangodohon dohot mambangkit indahan gulena. Mambasui boti manyapsap tu tapian ngada dope tolapsa, ima so dadaboru ni kahanggina doma tu tapian an.

I bagas ni Muklan i, mangkuling heand phonena, ampe na ro ma talipon tingon Si Isrot.

“Masonjia, Amang,” ning Muklan na martalepon i.

“On, dompak i motor do ami, Uda. Manuju tu Bilah Hulu tu bagas ni ompung Si Poso an,” ning Isrot sian heand phone i.

“Oh, syukur Alhamdulillah, pala dung tolap tu sodun, talepon mulak uda da, Amang. So langsung mangcek Si Siti dohot ompung ni daganak i,” ning Muklan.

“Olo, Uda. Anggo songoni naron muse ma utelepon tu uda. Inda pola dao sian kampung ni uda si Poso i tu kampung ni ompung nai. Tar satonga jom lobi ma i dalan, ning Uda.,” ning Isrot sian siborang.

“Jadima, Amang, tongkinnai tu bagas ni alaian ma au mangiutkon inanguda mu. Pala ro naron taleponmu so langsung bisa mangecek dohot parmaen i,” ning Muklan.

I Bilah Hulu, ima i Huta Lingga Tiga, ngada sajia dao tingon Aek Nabara, tolap ma motor tambang namaroban alai i.

“Kita sudah sampai, Nak. Inilah kampung nenek kalian,” ning Hamzah tu Si Poso dohot Si Pikek. Itogusa si Pikek nalaos haruar tingon bagasan ni motor i.

Dung mardalan motor i, mangalao alai tu sada banjar i huta i. “Rumah nenek kalian tak jauh dari sini,” ning Hamzah.

Dung tar tubagasan, ituduhon Hamzah sada bagas tu Si Pikek dohot Si Poso. “Itu rumah nenek kalian, yang warna hijau, yang ada mangga di halamannya itu,” ningna.

Inotnoti Si Poso dohot Si Pikek bagas i. Bagas nagodang, mardingding simin. Taridasa haruar sada anakboru tingon bagas i.

“Etek tai mei bo, Anggi,” ning Si Poso tu Si Pikek.

“Ee, tarsarupo dohot umak, kan?,” ning Si Pikek.

“Imada, baen nasarupo ma uida so ima etek ta aropku i,” ning Si Poso.

Mangalao anakboru i tu siambirang ni bagas i, mambuka pintu ni motor Kijang Inova, ibuotsa sada karanjang na menek sian jugukan ni motor i, dung i mangalao mulak tu bagas. Dompak so mangalangka tu bagas, tarbege tu iabana :

“Etek…!!”.

Iligisa na mamio i. “Etek…!!,” ning Si Poso muse mamio tingon dalan banjar i. Ipanotnoti anakboru i na mamiosa i, sada daganak alaklai dohot sada daganak dadaboru ombar dohot sada bayo, dungi itandaisa Si Hamzah na ombar lao i siambiarng di daganak na mamaio i.

“Oh..bang Hamzah,” ningna salaos mangalao tu alaman ni bagas i mangalo-alo aroro ni Hamzah dohot dongan-dongan nai.

“Dah lamo tak kamakhi, Abang,” ning dadaboru i tu Si Hamzah manopotkonsa sareto ijalangsa si Hamzah, tangan siambirangna laing mangaluk karanjang i.

“Ayo, makhi masuk, Bang. Ibu ado di khumah lagi makan. Famili kito ni dakhi mana, Bang,” ningna salaos manjalangi alak si Poso.

“Ini, anak-anak Kak Siti,” ning Hamzah.

“Hah….!!! Ya Allloh….!!! Oh..kakak,” ningna mandabuon karanjang i manjombai Si Poso dohot Si Pikek. Ngada ibotosa sanga songonjia be, taru nanialuksa do daganak na dua i. Juguk dursat doma alai tu tano i, palua tangis na gogo na mangaluk pompar ni angkang nai.

Ngada sajia onok, haruar inangna tingon bagas nibaen mambege sora ni boruna na tangis i jolo bagas i.

“Mangapa kau manangis, Laila. Ka tanah pula. Ehh..nak Hamzah,” ning inang nai.

Itopotkon Si Hamzah inangtulangna na haruar tingon bagas i. “Assalamu’alaikum, Bu. Enen anak-anak kak Siti, bakhu datang dakhi Mandailing,” ningna salaos manyolom inangtulangna.

“Apa…oiii….ya Alloh…ya Rohman….Anakku ya Alloh,” ningna tangis mangangguk marlojong tu alaman i manjombai paompuna i na laing pupu nanialuk boruna i tano i. (marsambung)

Comments

Komentar Anda