Budaya

Si Balkom Manjalaki Rongkap (3-sidung)

Si Balkom Manjalaki Rongkap grafis
Si Balkom Manjalaki Rongkap grafis

Na isuratkon: Ramli Hasibuan

“Oo Buyung, ngot ko jolo. Keheni jolo manabusi sira tu kode an. Ikle baya nga binoto nangkin na madung abis sira. Oo Rohim, ngot ko bo. Patibuma, anso kacak ita mangan kotu,” ima pio-pioni inangni ia. Tarsunggul si Balkom baen sora na mamio ia i, bulus antong jonjong ia marlao tu dapur, mijurna i tangga pudi bagas i. Dung ipaosah ia bahasona sira maia na giot tabusion, ia pe lao pat ma ia tu loponi Si Rusli an, adong tar 400 meter tu si. Icekak-cekak ia matani ia pake talakpak tangan dohot jajari, arana na baru ngot modomma antong, parnida pe inda aru tangkas dope. I sabariba tangan, itiop ia epeng saringgit panabusi sira. I siamun maniop ayu sagodang tanganni ia, nga na martungkot ia ba, tagi-tagini ia do songon i.

Tar donokma tu loponi Si Rusli i atia mambolus dalan godang kampung i, nida Si Balkom sada adaboru, inda osah sanga bujing-bujing sanga indekni alak. Tai pamake bajuna i, suang songon lagakni bujing-bujing. Kaluar ia tingon matokar (mobil) BMW na bontar na ipayakkon i topi dalan i, numbur daftarna NCA20. “Na giot tu lopo Si Rusli an do uida anak boru i. Boruni isedo baya i,” nutnet songoni Si Balkom, dung i iligin ia buseng i bagasan BMW i adong sada bayo tobang i karosi paroban matokar i, ia pe mijur ia mandapotkon adaboru i. “Wisdah, aso antong bayo tobang alak laini adaboru i. Mukona ama na deges, tai alak laina tobang-tobang. Sai bahat alak lai, au pe sugari ra do au i anggo songon i ma degesni alakna,” leng nutnet dope ia na marlao pat i.

Brooom, ning sada motor ompot sorana magogo inda aru dao tingon Si Balkom. Sareto ibege ia busengan sora alak na manyongkir. Ampengani adaboru nangkininan ona rantikkon arondukni ia na rara, na deges na iidani Si Balkom nangkininan. Adope antong, topet adong ayu saginjang sada meter sagodang tanganni ia itiop ia, kacak ihulpakkon ia ayu i tu si parmotor i. Topet buseng antong hona tu talonanni bayo parmotor i. Madabu doma bayo i. Motorni bayo i leng mardalan satongkin tai magulang tu lombangan, arana itondong ia tiangni elektrik, songon na marpedor doma motor i margaya-gaya i rubun-rubun i dompak su magulang tu lombangni dalan godang i.

Ro Si Balkom tu lambungni bayo na payak i tonga dalan i. Pupu marroan alak tu si mangaligi sanga na mangua. Adong matokar na ro, itahan kalai isuru to sabariba topi mambolus patunda adong bayo i i tonga dalan i. “Ligi homu i, leng tiop dope i tanganni bayo i bo aronduk na godang arga na rara punani adaboru i,” ning Si Balkom tu alak na bahat na ro maligin i. Adaboru ampuna aronduk i pe adong i joloni ia. Ibuot Si Balkom aronduk na deges i, igampitkon ia tu kik siamunni ia. Nga sajia lolot, tar tolu minit bayo na inda manyodar piluluson patunda hona hulpak i, ngotma ia. Bulus antong itiop alak tangan dohot patni ia anso ulang marlojong ia. Madung i talipaon alai polis so ro tu si manangkup bayo na malojongkon arondukni adaboru i.

“Terima kasihlah Encik. Kalau Encik tak ada tadi, entahlah apa yang akan terjadi pada beg tangan anak gadis saya Si Siti ni. Di dalamnya ada tiga puluh ribu ringgit, itu duit hendak bayar gaji pekerja. Kami baru keluar bank tadi. Kami berhenti hendak minum di kedai depan ni,” ning sada bayo tobang marsaro Melayu tu Si Balkom. Ima alak lai na mangoban BMW na iaganni Si Balkom i alak laini adaboru i, ampengani amangni bujing-bujing i do. “Nama Saya Rohim. Tak perlulah terima kasih Tuan. Itu sudah tanggungjawab saya Tuan. Apatah lagi berlaku depan mata saya,” ningna mangalusina, dung i mangkuling buseng ia: “Cik Siti, ini beg tangan Cik Siti tu, ambillah. Tengoklah di dalamnya, manalah tahu ada yang terjatuh atau tercampak.” Ijagit anak boru i antong aronduk tanganni ia i.

“Terima kasih ya bang Rohim kerana menolong saya. Ayah, bolekah saya berikan setengah duit ni kepada abang Rohim,” ning adaboru i manaili tu amangni ia. Munduk-munduk uluni ayani ia. “Bang Rohim, ambillah duit lima belas ribu ringgit ini tanda terima kasih kami,” ning Si Siti, adaboru bujing-bujing i. Pondokna bope inda ra Si Balkom manjagitna, tai dung ilomok-lomok adaboru i dot amangni ia i, leng ijagit iama antong. Ioban kalai busengan dope tu bank palulunkon epeng i.

I bagasan BMW i na giot tu bank i, isapai bayo i mada, sanga aha dope giotni Si Balkom tingon alai. Asalma idokon ia, marjanji bayo i ra ia malaksanaonna. Bo idokon Si Balkom antong, bahasona sanari antong dua maia na ipikiranni ia. Pasadana, manabusi sira satungkus arga saringgit i. Sapaduana, por rohani ia marbagas tai ning ia ngadong alak na giot tu sia baen parsuadaan, alak nasu puna sanga ahama pondok caritona. Bo inda sibinoto, ro alusni bayo i bahasona ra ia pabagaskon boruni ia Si Siti i dohot Si Balkom, asaldo ra ia dohot inangni ia mimbar tu KL tu bagasni alai an. Inda be da be. Ama na jop roha Si Balkom. Onma antong na ipainte-inteni ia i, hajat giot marbagas.

Lalu mulak tingon bank, ipataru alai buseng tu bagasni alai i kampung i. Sompat dope maradian i lopo Si Rusli manabusi sira na itonaonni inang Si Balkom i. Tolap tu alaman parbagasanni alai i, mijurma Si Balkom. Idapotkon ia tanganni bayo i, mandokon tarimo kasih dot mangontang maradian i bagasni alai i, pinomat satongkin. Tai ampengani na giot humacak do alai tu Simpang Durian, tar 20 kilometer tingon i, giot mambayar gajini alak na mangomo i sadun 30 alak. Patutma antong nangkin mangaluarkon epeng dope alai lima bolas ribu nai, arana madung ijagit Si Balkom sai bahat juo, sidoka ni alai aranani na manolongi i. Marjanji Si Balkom sada dua ari nai italipaon iama alai mandokon obar satontang nikahni ia dohot Si Siti i.

Dung kehe alai, inda tarida be BMW i, Si Balkom pe manaekma ia tu bagas tingon tangga pudini bagas i. Ning rohani ia, giot mandokonna ia bulus tu Umakni ia. Ipio-pio ia inda dong mangalusi. Dung i ibege ia mandobur-dobur aek na itauk i bagasan paridian na i parik bagas i. Ampengani na tonga maridi do inangni ia i. Ipayakkon ia sira i tu pantarni para-para pamayakan pinggan dohot parbasuan, tapak, pargulean dohot partambuanni alai i. “Umak, i para-para i da sira na utabusi i Umak,” manjou Si Balkom. “Olo,” ning inangni ia pondok, tingon paridian i. Kehema antong Si Balkom tu bilik. Na nonoan dope ilala ia matani ia. Giot modom dope ilala ia. Ipayakkon ia sude epeng na saribu na ilehenni bayo nangkininan tu sada kadak i bilik i, dungi ipakorop ia plastik sanggopanna i, ipamasuk ia buse dung i tu bagasan lamarini ia i. Ipagulung ia tu parateni ia i. Inda jabat dua minit madung mungkor ia.

“Umak, roma umak tu son bo. Rap mangan kita, adong dokononku bo tu Umak. Roma Umak tu son,” ning Si Balkom. “Madung manganma au da Buyung, manganma ho da. Tie na lolotan ko antong so ngot, donokma kotu Asar su baru ngot. Ungoti pe nangkin inda ra ho ngot. Upadiar songoni antong. Ro nangkin antong namboru Siti muyu tu bagas on, rap mangan busengan ami,” ning inangna i.

“Namboru Siti? Olo da Umak, au pe giot marcarito hal alak margoar Siti juoma tu Umak on. Giot marbagasma au dohot adaboru anak alak na kayo. Inganan bagasni alai i Kuala Lumpur. Nangkin ilehen amangni ia ji au Umak lima bolas ribu ringgit, sidoka patunda manolongi borunia. Hona lojongkon alak panangko arondukni ia marisi tolu pulu ribu epeng. Au na kehe manabusi sira na isuruni Umak i dei, i jolongku ma dabo tarjadina, au pe antong sompat uhulpak panangko na marmotor i Umak.”

“Baen lomona ilala alai, ima so ilehen kalai ji au sai bahat epeng i da, bope marulak-ulak udokon nga porlu ilehen. Opat bolas ribu ringgit ami lulun tu bank. Madung ibaen kalai nangkin buku bank ku Umak. Dung i, isuru ia buseng au marbagas dohot boruni ia i Umak, ama na deges si Siti i Umak. Bulan na roma ning kalai nikahna. Adong saribu nai ilehennu kalai i tu au, tarbaen panabusi tintin dohot bajunu ita na baru Umak. Ligin Umakma da i bagasan kadak na onan da, ululun i si nangkin epeng nai.”

Ama na poning marcampur songon nasu parcaya ilala inangni Si Balkom managion caritoni anakni ia i. Tai bele-bele pasari-sari rohani ia na i bagasan i, iparo ia tanganni ia mambuka tutupni kadak i. Dung talak antong kadak i, iligi ia i bagasanni kadak i gambar-gambar na lolot maia na adong i si. Gok gambar maia i bagasanna i.

“Na marnipi do ho dabo Amang. Nga na adong i kadak on epeng, gambar-gambar na honok maia na adong i son. Inda adong alak margoar Si Siti mangalehen epeng tu ho. Au pe Amang dabo, dung modom ko nangkin, nga dong baya usuruon ko kehe manabusi sira. Na bahatan dope sira i ganananna i. Auado antong tabusion dope sira i. Ho da Amang, marbismillah do ho dabo lalu giot modom, ibaco do otik doa-doa i. Ulang dompak su modom leng epeng maia pikironmu.”

Inda be da be, nga tardokon be sa songon jia ilala Si Balkom na manangion obarni Umakni ia i.***

(Carito on isuratkon pukul 5.15 manyogot, Nilai, Negeri Sembilan, Malaysia). Ramli Bin Abdul Karim Hasibuan lahir di Kampung Kerangai, Jelebu, Negeri Sembilan. Satu kawasan berbahasa Mandailing di Malaysia. Sekarang beliau adalah News Editor (Editor Berita) surat kabar Utusan Malaysia

n/b : Cerita pendek ini sengaja dieja demikian ejaannya sebagai bagian program penerbitan kamus ejaan standard bahasa Mandailing oleh penulis, dibantu sekumpulan orang Mandailing di Malaysia dan Indonesia.

Comments

Komentar Anda

Silahkan Anda Beri Komentar

Situs ini menggunakan Akismet untuk mengurangi spam. Pelajari bagaimana data komentar Anda diproses.