Na nisuratkon: Saad Lubis
Mardonok-donok waktuna nangkan nagiot mamili wakil-wakil rakyat ima di 9 April 2014 mur-situtu kombur ni jolma di lopo kopi, adong mandokon ulang ipili caleg na mambagi-bagi epeng, adong muse mandokon angkon namambagi-bagi epengdo caleg nai anso ipili, adong muse mandokon anggo naadong caleg namamabagi-bagi epeng angkon itarimodo, tai ipili sanga ise giot niba.
Dilopo kuburan nai Sigalapangpe namursitutudo kombur ni jolma satontang nagiot marpili wakil-wakil rakyat, jabat tolap si katuk tulopo kuburan disogot niari, indape naro kopi namarsendok, namabahas politikma bulus, nagkan adongma ning si katuk napenong-penong dung salose pemilihan, harani namarbangkiang-bangkiang maia namamili ia, inda mandapot karosi jabat, patundani imada anso marrintikan ning si katukma mamancing anso panas kombur dilopo kuburan.
Anggo caleg do katuk madung siap dei monang mandung siap kalah, pala monang antong markantor di payalotingma ima dikompelex perkantoran Pemkab Mandailing Natal.tai pala natalu inda sadia namandukung, pala naparsabado harejo nia salolot naon, mulak-mulak marsaba mei, inda jabat penong-penong, paling sapoken mursop-ursop monmon nia ning sutan tabuang salaos mambernong si katuk, harana songon nalaju ibegeia pandokon ni si katuki.
Anggo au pala ro siram-siram anutarimodoba dongan ,songonima antong maolna namanjalai epengi, agas tu agas iba harejo, panabusi ni timabkope indaa lopeh, napupuma utalion tu dalani sanga adongdo naro caleg nagiot manyolomkon, mudah-mudahan iambang caleg naroi hape tukang asurdo ning si katuk mangkardak-kardak.
Dung marbilang arinaido dabo anso mamili, sotarida parmainani sanga namur matangkangdo, pala mardonok-donok waktuna marmungkapan mei nangkan nagiot mambagi-bagi rasoki, harana anggo inda adong solom-solom namarisi, inda adong harapan angkan naipili ni dongan, angke madung somal pala giot mamili wakil rakyat mur matangkangma parmaianan, pala mardonok-donok waktuna italigima marroan mei, ningsutan mangkahap mantong mangadopkon si katuk.
Biarku tatap langit ning calon wakil rakyatido, loja iba painte-inte na hape abudo, mabang iombus angin, ariari ipainte sanggarodo manyolomkon inda adong naro, biarku kecek badongkangdo harejoon balanjo kurang, pamatang marnyiang, marslutap utang parjugukipe murbingkang iambang naroma solom-solom hape bayo napatitipkon sasabido, ning sikatuk songon naholas.
Ualng maharoptu, ulang mayakintu, ulang jabat ro tunai katuk, pala naro antong solom-solomna ita tarimo, pala indapero solom-solom ita pabahat sobar, itapili sanga ise napas ibagasan roa ima ita pili manjadi wakilta di DPR, anso ipature ia nasibta rakyaton, nalojama ho katuk npainte solom-solomi ning sutan mangkahap laos panaet pangidupan.
Pala indaro katuk solom-solom marisi pabahat sobat pagogo mangan, madung songoni mei nasibta rakyaton, anggo harana natungkap talakdo namanjalai tudukoni ari-arion nabaenon mei katuk, adong caleg namanyolomkon tarimo dohot ucapan tarimo kasi, pala hum songon abu naiombus ni angindo caritona apus songoni indoramu, angke pala topet boto masona haroro ni pardangolani, pas boto songon nasib ni pege lambang dohot sirape burburon, ning sutan tabuang laos marpupu manyirik-nyirik matania tu dalani, mangaligi sanga dongdo naro pataru solom-solom.***
