Home / Budaya / Tes Paet Pake Sendok

Tes Paet Pake Sendok

Serial Lopo si Kodir

Nisuratkon: Askolani Nasution

 

Pupu tatap tu jae, tatap tu julu, lek naso dong kalak ro. Marsak roa si Kodir. Olo, marlopo ibantong, ngadong na ro. Nga he marsak iba i? Goreng manyogoti pe lek dursat soni di talam nai. Taru pisang sitambatu na malamun tu muse. Melel doma songon parpibir si Kodir.

Alla baya, bope dabo na marutang kopi paet alak nai, lek adong ma dongan niba gari manukek, ning roa si Kodir. Olo. Gok an doma lanok songgop tu si Kodir pado tu goreng i. Rongit dope tambana. Bus bas doma tu pat si Kodir na rabakon i.

Ah, iputar jolo logu India on. “Mere naseeb main too hain ke nahee….” Di ingot ia bulus Hema Malini dohot Amita Bachan. Mikim-mikim si Kodir. Taringot na jolo manonton dot mantani di beskop Samudra. Hahai…

Sirit ni anak boru da, ning si Kodir. Tagenan do ia marbagas tu parpadati pado iba parlopo.

Olo, sapala na juguk sajo ma anak borui di samping parpadati i najolo. Rukrek sora ni padati, rukrek muse roa si Kodir.

“Anjis,” ning si Kodir laos manyumpakkon aek.

Ala… Ro muse bayo na laos tu saba. Sandang arondukna. Tes paet muse ma pangidoanna. Pupu ipoluk ia tu bagasan aronduk, pupu mangan gadung na ibolgang. Ja mantong diarionsa tu si Kodir. Leam doma ilala si Kodir babai.

Olo, si Kodir pe gok do jagal nia. Adong kacang goreng, roti, goreng bage. Pade do ilala bayoi oban panganon nia tu lopo.

Ee, na oban muse do rupa gulo pasir nia. Dabuon tu tes paeti. Mangido sendok muse dope tambana. Pabahat-bahat basuon, ning roa si Kodir.

I balun ia sude jagal. Marompot doma.

“Bo, tutup ma nanga,” ning bayo na mararonduki.

“Olo. Aha do guna na au marjagal anggo na oban do panganonmu,” ning si Kodir. Semeng doma.

Laos idurus si Kodir ma api. Martimbor doma sude tu jolo ni lopo. Hukkek jabat bayo na mar aronduki baen timbus na. Banggar ni bulu ma ilalaho duruson. Aso nga narbual.

Marlojongi alak baenna. Iambang kalak adong na amosokan.

Angkon na soni do rupa mainna so ro alak, ning roa si Kodir.

Taringot na, bayo na mararonduki, imada namargoar Jamarsumpol. Adong dei caritona na jolo atia poken Sinayan di Mompang. Olo, di poken i dabo na jolo adong dei parlopoan ni parsadu. Marsitambat kudo na ma, laos mangan kotan manyogot.

Roma bayo maroban kudo na marnyiang. Diontang Jamarsimpol martimbang kudo. Bo na jop mantong roa ni bayoi da. Kudo nia le na marnyiang manyintuk do. Pala ida ia kudo ni Jamarsumpul, hum mok-mok do nidaon. Martimbang mada kudo i. Sep-sep an, inda dong na manukut.

Na jop mada antong roa ni bayoi. Laos itambat ia kudo on tu sadu nai, maricak tu jae. Tircak tircak ning roda ni sadu.

Hum sampe dabo tu Siram-ram, gopak ma kudo i. Inda lobas na jonjong be. Pala iligi bayoi kudo i, na sumpol do rupa abit buruk di partuaken nai. Pala itarik bayoi abit buruk nai, laos manulbas ma nakotor na. Na buruson do rupa kudoi. Ima so isumpol dot abit buruk.

“Sirit ni Jamarsumpol da,” ning bayoi. “Madabu oncongku dio.”

Ima. Onpe oban ma gulo nia dot panganon nia tu lopo si Kodir. Ima so isiram si Kodir tataring nia.***

Comments

Komentar Anda

Silahkan Anda Beri Komentar

Situs ini menggunakan Akismet untuk mengurangi spam. Pelajari bagaimana data komentar Anda diproses.

%d blogger menyukai ini: