Budaya

Marragam Mocom Boto Parkancitan

Marragam mocom boto parkancitan tarimohon dopak mangolu diginjang niduniaon, anggo hasonangan, sada niroha maia mangadopi cobaan dohot tantangan, bope bahat epeng adong motor alus mangoban-oban iba sanga giot tudia langka, anggo naso sada roai markancit juo pamatangi, angke mabiarma ro panangko, modompe lalu inda sinok, cocakdo namanangkup rongit didingdingi, madung dosar taroktoki.

Dompak diari nonat indaban marusaho inda adong epeng panabusi lasiak dohot guleon, parkancitan juo mei nian tai tardokon dei parkancitan nadialap-alapan, angke naadongdo tano bope sanjongkal duanjongkal ditinggalkon simatobangi inda iparkobun-kobun, nadiaranganan musedo tinggal, panyakit naso tarubati doma gorarnii inda adong ubatnai, isapaanpe mantari nai Toko Obat Mona DX di dalan tu Hutasiantar, orgos totmu ningia doma jawabnai.
Nasalalu binege di keceti halak satontang nalumobi parkancitanna dihangoluanon adong dua mocom, anggo parkancitan naitingalkon simatobangdo antong sangape naitinggalkon ni istiri sanga suami angke baen nasongoni mei dompak tarimoon ni sada-sada halaki, tardokondo inda parkancitan, cobaan dei sian Tuhanta namarkuasoi.
Songoni parkancitan harani hamiskinan sangape parkancitan panyakit ni badan namaol ubatan, manjagai amak boto bulan margonti taon, mudah-mudahan anggo tabah manarimona songondia janjian ni Tuhanta nangkan ilehen dei razoki pala namiskin, songoni juo namarnyae, sehat juo dei ujungna arana satiop panyakit dong ubatna kecuali sakarotul maut ning guruntai tile.

Satontang nalumobi parkancitanna nasalau dikeceti dongan binege ima ibalut utang, sakiro igadispe sude harto naadong, inda cukup pambayarina, indape ngot amporik disogot niari madungro namanunggui utang, pala bonom mataniari naro musema bayo oban sasabi rambasna manyapai sanga andigan ibayar utang, markilap doma baba ni sasabi rambasi baen bontarna, nabaru ilayan mantong, anggo silop bayoi nalancimdo boto talonani baen tajom ni sasabi rambasi.
Napaduana, marsirang mangolu simatobang, tarmali-mali tondi boto pinompar, mabiar nabage mangida halak, pala marsuo dohot donganna iarsak halaima boto, adong namandokon posoan simatobangnia halaklai sian robung, adong muse mandokon madung mabujing umak nia mulak, daganak mantong, marsidokon-dokononna boto mangarsak dongan nialai namarsirang mangolu simatobangna.

Sada danak diwaktu termonung-monung sado-sado ia disapai bayo namamolusma sanga ahado namasa namuba anso mardangol juguk tondo manungkol isang di topi dalan danak namuloi maposoon, ilu nimata nidanakpe marsabur-sabur marcarito sirang ningna simatobangnia, satiop marsuo dohot dongan idokon niama simatobang halak lai naselingkuh, idokon musema simatobang dadaboru namulak-mulak mabujing, nahancitma uda parkancitanon, kehe au rap dohot ayah inda uida simatobang dadaboru, kehe au dohot umak inda uida simatobang halaklai, anggo pangidoanku tu Tuhan, anggo inda mardenggan simatobang mulak, baen hancitna pananggunganon sugari tibuma icabut tuhan osa nisimatobangku dua-duana,anso batas sabatangkara au diginjang duniaon, ning danaki boto salaos marpupu tangis.
Pabahat sobar amang, angke pala tarjadi parsarakan dirumahtangga baen naso olong dei roa ni simatobangna dipompar nia, ning bayoi doma boto mangalus, salaos iapus ia ulu ni danakon.(MO/saad Lubis)

Comments

Komentar Anda

3 thoughts on “Marragam Mocom Boto Parkancitan

  1. sedih ….. duka …. galau biasana halak mandailing dibawa dalam nyanyian, untuk mengurangi rasa duka yang diderita .
    ‘” Paningkiran di kilo tolu
    paulu aek tu rantopanjang
    Totop saroha lee saleleng mangolu
    sampe hita lopus matobang.” .

  2. ” Bayo Angin di Huta PULI
    Mangalap boru Tu Tangga Bosi ,
    Janji ki Anggi Ualanho Sangsi
    Suang dei Songon janji niMataniari….

    Purcaya do au di au lee.
    harana inda jungada au Margabus.

    Margabus i alee
    Baen na hurang tangkas dei
    disapai ho au .

  3. Si Bulus-Bulus Sirumbuk-rumbuk, merupakan suatu Motto dari Orang Mandailing tempo dulu hingga sekarang, kalau kita cermati arti folosofi yang terkandung dalam kalimat tersebut sangat dalam kalau ini kita terapkan di zaman sekarang ini niscaya tidak ada lagi keributan berupa demonstrasi massal , karena kalimat ini mengandung kesetiaan kepedulian serta ketulusan, misalnya untuk membangun suatu pertambangan sebelum di realisasikan tidak ada yang ditutup tutupi semuanya harus terbuka dan jelas dan sifat berbagi juga di tekankan dalam hal ini tidak ada yang menderita akibat suatu proyek, tidak akan terjadi kecemburuan karena ketidak adilan . Sesungguhnya Nama tersebut adalah nama sebuah buku karya Willem Iskander didalamya tidak hanya Nasehat untuk anak sekolah tetapi juga nasehat untuk masyarakat seperti ” AMA NI MARPULI HODONG “. mengingatkan masyarakat jangan berhayal terlalu tinggi , tetapi yang realistis sajalah.

Tinggalkan Balasan ke Hafis NasutionBatalkan balasan

Situs ini menggunakan Akismet untuk mengurangi spam. Pelajari bagaimana data komentar Anda diproses.