Budaya

MARSIDAO-DAO (episode 26)

Marsidao dao grafis
Marsidao dao grafis

Novel Mandailing

Nanisuratkon : Dahlan Batubara

Sogot ni ari, Siti mambangkit gule na madung masak tingon uali i dalian tataring i. Isonduksa indahan tu pinggan Si Siti dohot si Poso nagiot mangan manyogot marayak kehe tu sikolana.

“Naron dung muli sikola, alap anggimu tu ompung Rosma an da, Inang,” ningna arop boruna.

“Olo, Umak. Ompung Rosma langa parorot Si Rahim,” ning Si Pikek.

“Olo, harana dompak ngada kehe ia sanga tujia sadarion,” ning inangna.

“Tu saba jia langa umak mangomo sadarion,” ning Si Poso.

“Tu saba ni bou Marlan mu, mangomo manaktak duru,” ning inangna.

Dung kehe alai dua tu sikola, mangalao muse ma Si Siti tu bagas ni ompung Rosma mangompa si Rahim i abara siambirang; aronduk sandang i abara siamun; tajak jing-jing.

“Naron kotu ma ia ialap Si Pikek da, Bou,” ning Si Siti tu ompung Rosma sareto mangarkari parompa pangambit ni Si Rahim sobaru ilehensa pinomparna tu ampuan ni ompung Rosma.

“Jadi ma, Maen. Pasada ma roamu mangomo, denggan do ujago ia,” ning Rosma.

“Ke mau, Bou”.

“Olo. Denggan-denggan mangomo,” ningna.

“Olo, Bou,” ning Si Siti salaos mangalao tu saba pangomoan, manadingkon Si Rahim na tangis mangiut tu inangna. Ngada iporluon Si Siti be tangisan ni pomparna, harana nangkan sigop do ia tolap tu saba pangomoan an, mari-ari ari madung mur maginjang.

Sonima alai sannari. Dung do jumolo amangna, na ganop ari doma inangna kehe mangomo tu saba ni alak. Ngada adong pangomoan nasihil tingon saba. Adong pe pangomoan na sihil, tu kobun doma, mangarabi apea. Pala ngada i, batas tu kobun-kobun doma mangomo mangalata parkobun-kobunan nasi-nasi sanga pe kobun-kobun parbulunggadungan ni alak.

I pe, ngada bahat na paomohon i huta i, bahatan do alak namangomo umpado na paomohon, angke dompak akoletan ni alak sahuta nibaen tuor ni gota na mura, naso unjung-unjung be magodang madung martaon-taon. Ima dalanna, so bahat inang-inang tingon huta i na mangomo tu huta balian, ima goarna na marsidao-dao.

Si Siti, ngada pe unjung dohot marsidao-dao, harana i bagasan ni na dua poken on, les adong do napaomohon tu ibana, bope mangomo i saba soni muse mangomo i kobun-kobun parbulunggadungan.

Dung jumolo alaklaina, na pupu do ro ontang-ontang mangomo tu sia. Soni ma alak i huta i, nibaen na on dope Si Siti na bariba tangan, ima so adong sada dua alak na ro mangontang mangomo. Angke ngada tolapsa mangguris. Ima so ipaulak kobun gurison na iguris ni alaklai nia i tu ampunasa. Mari-ari, ngada adong dadaboru mangguris i huta i, adong pe baen namandongani alaklaina do pauli-uli takar ni gota apea.

Muli tingon sikola, ngada tu bagas ipalalu Si Pikek, tu ompung Rosma an dope parjolo mangalap anggina.

“Bo, ma muli langa sikola, Anggi,” ning ompung Rosma tu Si Pikek.

“Olo, Ompung. Enjeng do ia i son,” ning Si Pikek.

“Tar jot-jot do tangis baya, baen naso itanda ia ompung aropku,” ning ompung Rosma.

“Tile, anggi, enjeng ko langa dohot ompung. Baya, nga itanda ho langa ompung. Tai parorot ko baya ompung, kehe kakak tu sikola, umak nga pe muli ngon saba” ning Si Pikek.

Mar sior-sior tarida pangaligi ni Si Rahim tu angkangna. Songon na  madung sada roana mangida Si Pikek na madung ro mangalap ia.

“Oi baya, jop doma roa nia dung ro ho, Anggi,” ning ompung Rosma sareto paimbar Si Rahim tingon ampuanna tu ampuan Si Pikek.

Ngada pe saru malo mangolitkon parompa tu abarana. Ima so ipature ompung Rosma pambolitanna. Ima nangkan mangompa anggina, maroban muli tu bagasna.

“Dung jot-jot tongkinnai mangompa, muli-muli malo ma ho i mambolitkonsa. Ompung pe na jolo dompak sa ho on, soni dei. Inda togos pambolitkonna,” ning ompung Rosma.

“Olo, Ompung,” ning Si Siti sareto mangarais tas sikolana tingon pantar parjugukan i, isandangsa i abara siamun. .

“Ke ma ami, Ompung. Tarimokasi tu Ompung. Naron ma uoban ia mulak pala kehe au sikola arob,” ning Si Pikek salaos mangalao mangompa anggina manadingkon alaman bagas ni ompung Rosma.

 “Olo, Anggi, togu-togu  i dalan,” ning ompung Rosma.

“Olo, Ompung,” ningna.

Dung tolap tu bagas, iarkarisa bolitan ni parompa pangambitan ni anggina tingon abarana. Dung marsalin baju, ipatorusna tu dapur nangkan mangan kotu. Aum-aum Si Pikek salaos pajuguk anggina i arumpangna. Sasanoli isulangisa anggina.

Sidung mangan, maroban pinggan basuon tu bondar tapian, ilehensa Si Rahim tu Si Poso parorot anggina dompak mambasui Si Pikek.

Ira-ira pukul 2.30, iobansa mulak anggina tu ompung Rosma, harana nangkan kehe ia dohot Si Poso tu sikola maktab.

Tangis muse do Si Rahim dompak isurduhon angkangna ia tu ompung Rosma. Santak tu namangalao manadingkon alaman bagas ni ompung Rosma i, les na tangis do Si Rahim mangiut tu angkangna. Tai, sonjia mantong ibaen, sikola maktab ngada tartadingkon. (marsambung)

Comments

Komentar Anda

Silahkan Anda Beri Komentar

Situs ini menggunakan Akismet untuk mengurangi spam. Pelajari bagaimana data komentar Anda diproses.