Budaya

MARSIDAO-DAO (episode 35)

Novel Mandailing

Nanisuratkon : Dahlan Batubara

Marsidao dao grafis
Marsidao dao grafis

Sidung tingon bagas ni Ompung Rosma, na tu bagas ni Muklan parkahanggion ni alai ma Si Siti mangalao, ompa daganakna nanipaiut Si Pikek. Ngada tolap Ompung Rosma be parorot Si Rahim, angke arunna na laing milas situtu dope.

I bagas ni Muklan i, iobarkon Si Siti tu dadaboru Si Muklan i sanga ise doma parorot Si Rahim.

“Ise doma naiboto Bou alak namarlapang,” ningna.

“Au pe nian bisa au do, Maen, tai inda ganop ari muse. Tolu ari ma sapoken, ibagas do au. Ari  nalain nai doma ita jalaki alakna,” ning dadaboru i.

“Aropku sapai jolo batas dadaboru si Mahlil, aropku tarlapang do waktu nia. Harana anggo bisa les tu kahangginta do jolo ita jalai. Pala ngadong be baru tu na balok,” ning Si Muklan tu dadaboru i.

“Anggo songoni kei ma jolo pio nenek Landong mu, Inang,” ning Siti tu Si Pikek.

“Olo, dokon na pio-pio Ompung mu, da Anggi” ning dadaboru i tu Si Pikek.

“Olo, nenek,” ning Si Pikek sareto mangalao aruar tingon bagas i.

“Jadi, piga ari do jabat Si Pikek maroban anggina tu sikola,” ning Muklan.

“Nangkin dope nian, Amangboru,” ning Siti.

“Imada, ulang sugari jabat soni be pangidoanta. Ibo roa mangida Si Pikek. Jiar ma, Maen, ulang pikirkon be, ima gunana ita markahanggi, na borat rap ita panayang,” ning Muklan.

Dung ro dadaboru Si Mahlil i, iobarkon Muklan sidokononna. Sonima arasokina, rupa marlapang do ibana. Ima domu ni tahi i, ibana ma dohot dadaboru ni Muklan nangkan marsoluk ari parorot paompu ni alai i, ima paompu na tingon kahanggina nangkan ibolo do goarna na markahanggi,  marsitoguan ihadangolan; marsiboloan iakoletan.

“Tai, nadaoan ma ho baya marniang, Maen,” ning dadaboru Mahlil i tu Si Siti.

“Olo  baya, Bou. Batuk muse maso on. Madung marsuntik mangan pel bage ma,” ning Siti.

“Ulang maporsir tu na mangomo i, Maen. Dat-dat maradian do sasanoli. Jago do kasehatan. Dungi pupu do bolgang unik dohot tomu giring-giring i so les togos pamatang inda momo ona arun,” ning dadaboru Muklan i.

“Imada, Inang. Anggo arasoki ni daganak i do, ulang jabat marsak roa muyu. Harana ma ijamin tuhanta do ganop-ganop arasoki ni hamboNa,” ning Muklan.

***

Sogot ni ari, ngali ni ari lumobi tuk. Jongjong alai opat i topi dalan i painte motor Anatra nangkan maroban alai tu Siabu manjalahi pangomoan i huta balian. Laing urker do batuk ni Si Siti sasanoli. Ngada dope adong tarida tu murakna.

“Burangir i ma dabo jolo bolgang dohot gulo bargot, anta ra murak batuk mi, Eda,” ning Saleha.

 “Sangajo i doma batas uinum anta ra so. Nian madung ilehen mantari i ma pel tolu mocom, tai leng ro dope,” ning Siti.

“Inda maua aropku bope mangan pel iinum juo aek burangir i,” ning Si Marmah.

“Nga maua bai, ampe ulang kimia tu kimia pe, anggo ubat kampung tu pel nanggo pola bai biasona,” ning Saleha.

Motor Anatra tarpaida mullop sian tekongan an. Iambat alai, so motor i jolo ni alai. Dung ibagasan alai, mardalan motor i mamolus manyolom sogot ni ari i.

Marbabao mamatangi ma saba ni parsaba i huta Siabu. Ima huta na ombar balok dohot huta Huraba. Unduk-unduk alai opat i saba i pauli-uli batangina sareto mangumpati duhut-duhut na topak i tonga lupak i.

Ngada songon manajak mamangkur loja ni na marbabao mamatangi. Jarupe songoni, laing tonggong marngiluan do ak nibaensa, angke na pupu unduk do tingon manyogot i. Ngada hum i muse, buhu ni tangan dohot indora marngaoli mancit do nibaensa, angke mambalikon batangi angkon na gogo do so tarbalikkokn sibalikon.

Soni ma alai na mangomo i huta balain i, marudan marlasniari. Ngada mamboto loja ni sibuk sangape nyae ni pamatang boti pat na pupu purogoson. Ima opat halak ina-ina na madung bariba tangan, na madung jumolo amamg ni daganakna, na mangomo marsidao-dao mamparkayaon pinomparna.

Maradian i kotu Luhur i, sidung sumbayang boti mangan kotu, margulangan alai i sopo saba i margulung-gulung patigor ak namarngaoli na manonggong.

“Oih..pisat jolo ak ku tontang kanan i,” ning Marmah tu Si Murni.

“On do,” ning Murni dompak mamisat ak ni Marmah.

“Olo..oii..ima. Pisat jolo torus. Ala baya, najolo aya Si Ipin do baya mamisatnaon,” ningna.

“Porkon udan, markawinan ma homu dabo mulak, so tenang ngolu muyu,” ning Saleha.

“Si Siti ma ona pili parjolo ita i aropku. Bope marniang les tonggi,” ning Marmah.

“Oii..jo bagian, ulang majolo alaklai, um batukku na urker inda tarpasari-sari au,” ning Siti mamaben alai na i sopo i martata mangkairi.

Mataniari mur geleng i ginjang, mandokon ari marayak pukul tonga dua. Amporik matucitcit i dangka-dangka ni apas na nilambung kueni i. Mangalao alai opat tingon sopo i tu lupak i palalu babohon dot namamatangi. Sonima santak tu potang ni ari. Sasanoli batuk Si Siti urker tarbege tingon saba i. (marsambung)

 

Comments

Komentar Anda

Silahkan Anda Beri Komentar

Situs ini menggunakan Akismet untuk mengurangi spam. Pelajari bagaimana data komentar Anda diproses.