Sitaing Dua Sambong

Muda adong horja disada huta di luat ni Mandailing marsiaben modelna mantong anak-anak gadis kehe manghadiri horjai, adong make upna songon moel ni anak gadis India sanga Pakistan doma tarida, sapala dung marlagut anak-anak gadis marnyanyi ma halai margonti-gonti, adong muse namambaca parzanji, marsitarik laguna mantong angke namarriang-riang karejoi tile.
Naposo bulung pe sibukma patur panganon didapur sanga di panar tonga, tibo dihatiha mangan, marsidokon dokonannama anak gadisi, adong nabahatan kecekdo pado-pado marsilamotan, anggo sitaing bru suti ipupuia mangaumkon indahan, arana tarsongon nacocok ilaia gule siak ni gule ambengi.
Dung sidung namarsilamoton, adong rupana dongan-dongan ni sitaing boru suti manyirik-nyirik sian samping sangapiga noli sitaing boru suti martambu, rupana jabatdo dua noli sambong nia martambu.
Nabulus ikecekkon niama didongan-dongannia sitaing boru suti nagogoan mangan, dua sambong itoskonia, aha le ning nasada muse mantong, namambotoma sude anak-anak gadis sitaing boru suti nagogoan mangan di horjai, muloi ari sadarii igorar-gorar anak gadisima sitaing boru suti ima sitaing dua sambong.
Gidik-gidikdo roa ni naposo-posoi pabege-bege gorrni siating boru sutii, sitaing dua sambong mantong, adong nabage namamatai sitaing boru suti, inda cocok anggo sitaing dua sambong, sitaing dua mangkukdo napade ning poso-posoima salaos mangkair godang.
Maila doma sitaing boru suti mijur toru dung itambai dongan-dongan nia gorarnia, angke pala mardalania adongma tarbege sora Sitaing dua sambong, tai inda nida halakna, sangajo songonima madung somal di mandailing, natibu-tibuan ibaen dongan martamba gorar, songon natarjadi ditaon nasalpu, baen inda mrkupiah bapaki mardalan-dalan di alaman ni ingananna, nabopakan pal-pal nia, adong muse manokonna mardalan-dalan bapak pal-pal.
Adong muse antong mandokonna baen madung tobang bapaki inda ningia bapak pal-palbe, ompung pal-pal muse doma, padohal sopal-palonpe bayoi baen sangatnado namarpikiri, marrurusan obuki jabat, marbual pal-pali ning donganma songon na pahino-honoon tile.
Nalobina tubyo napal-paloni musema ning dongan ipasahat sitaing dua sambong, arana bope madung tobang ompung pal-pal nadolian dope ilalaia pado medan, posoan pado robung, laukan pado epeng, ompung pal-pal mantong naso mangirpuuuuuut, ning dongan markusip-kusip diparjuguk-jugukan dipantar gogat.
By:Bayo Lubis