Misang Natorangan Ari

Madung salaluma tarjadi di masyarakatta ise-ise halak namanjadi pahlawan kesiangan gorarna hasidunganna pasdo songon misang natorangan-ari, panaili rambon-rambon, pamikirna lange-lange, mabiar muse dope ona umban arena marreok-reok manuk ditonga borngin dipelosia.
Pala marpili katua adong mei antong sijajang-jajangonna markaok-kaok tu jae tujulu mangajak-ajak halak anso idukung calon nia, arena calon katua natangkangnai ningia gorarna.
Angke anggo ningroa nia pala monang katua pautan niai nangkan marjabatanma, dibaenma manjadi kepala banjar sanga kepala lorong, atope kaur ningna gorarna, sapala dung monang pautani inda naadong jabatan nia, arena sikola niape sikola batang pisangdo, sinaloan niape inda jabat muap tu balik nihuta.
Sapala katuama nakatua, ipili ibanama donganna namalo karejo, angke inda nagiot antong katua mamili donganna nasomalo karejo, manopi-nopima boto halak namanjadi pahlawan kasiangani songon misang natorangan-ari, angke ansora pe ia markaok-kaok tujae-tujulu dompak hatiha mancalon katua dope, harana namangharopkon jabatando, songondiame antong nangkan namandapot jabatan naso tukiado supping nia tile.
Dimulo-mulona napatenma ningia calon pautan niai, napintar, nabisuk, namalo mamimpin rakyat, natarpatujoloma, sapala dung katua, harana inda mandapot jabatan ia abisma ningia otoni halak katuai, naso mamboto untung dei, idokonna nabagema halak natilako, naso tarpangan nabage ningia indahanna, songonima nasalalu tarjadi di masyarakatta anggo halak na manjadi pahlawan kasiangan manurut nadung salalu tarjadi, pasmei songon misang natorangan-ari.
Madung salalu mei tarjadi tarutamona dihuta-huta, halak nadonok tu calon katuaido parjolo laon ni calon katuai, songonima degesna mulo-mulo asalna, tai harani namangharopkon jabatando rupana, sapala jabatan inda dapot, caci maki dohot fitnah doma manabur , idokon –dokonma tudongan katua naso mangingot jasa, sanga katua namandapot dibana, nadengganpe katuai na iaduon nabagema idokon namanggadis beras minkin tu halak nakayo, angke pala jabat sala niet rupana nangkan naswegoma ujungna.
Idokon katuaipe dung sumbayang Jum,at ulang jolo mulak arana nagiot marpoket pajong-jong pangajian sangape mambaen perayaan keagamaan, anggo pahlawan kesiangani, nabulus maturutupma tu pintuan, inda patuhbe tu parentah ni katuai, sangajo nalaon doma dikatuai, sidung boto kaji-kaji pala jabatro nasongonian.
Imada boto anso ipalidangma niet pala mangkarejoon karejoi, pala namanjadi pendukungma di sada calon katua, tolado nian, tai nietna pala manjadi katua sangandigan naidukungi manjadi katua namalo parorot rakyatnama, namanjadi ihutanma tu dalan nadenggan, ibarat ni induk ni manuk namambolo pinompar-pinomparnama nian sugari, ulang antong nietna pala manajadi katua nangkan marjabatanma, nangkan nasegame ujungna, pas mei songon parumpamaan ni tobang-tobang naparjolo, songon misang narorangan-ari.***